வாலிபர் கைது

புதுச்சேரி மாநிலம் காரைக்காலில் இருந்து டீசல் கடத்தப்படுவதாக போலீஸ் சூப்பிரண்டு ஹர்ஷ்சிங்க்கு தகவல் வந்தது. இதையடுத்து அவரது உத்தரவின் பேரில் தனிப்படை பிரிவு சப்- இன்ஸ்பெக்டர் பாலமுருகன் தலைமையில் போலீசார் நாகூர் அருகே வெட்டாறு பாலம் அருகில் வாகன தணிக்கையில் ஈடுபட்டனர். அப்போது காரைக்காலில் இருந்து நாகப்பட்டினம் நோக்கி வந்த 4 சக்கர வாகனத்தை நிறுத்தி சோதனை செய்தனர். இதில் புதுச்சேரி மாநிலம் காரைக்காலில் இருந்து நாகப்பட்டினத்திற்கு 3 ஆயிரம் லிட்டர் டீசல் கடத்தி வந்தது கண்டுபிடிக்கப்பட்டது. இதையடுத்து தனிப்படை போலீசார் அவரிடம் விசாரணை நடத்தினர். விசாரணையில் அவர் வாஞ்சூர் சமத்துவபுரம் முல்லை தெருவை சேர்ந்த ஜான்பீட்டர் (வயது22) என்பது தெரியவந்தது. இதுகுறித்து நாகூர் போலீசார் வழக்குப்பதிவு செய்து ஜான்பீட்டரை கைது செய்து, அவரிடம் இருந்து 3 ஆயிரம் லிட்டர் டீசல் மற்றும் 4 சக்கரவாகனம் ஆகியவற்றை பறிமுதல் செய்தனர்.