மின்வேலிக்கு எடுத்த திருட்டு மின்சாரத்தால் வாலிபர் உயிர் பறிபோனது

கமுதி,

ராமநாதபுரம் மாவட்டம் கமுதி அருகே வழிமறிச்சான் கிராமத்தை சேர்ந்தவர், பெத்துராஜ் (வயது 21). இவர் தனது நண்பர்கள் சிலருடன் நேற்று முன்தினம் இரவு முயல் வேட்டைக்கு சென்றுள்ளார். பெரிய ஆணைக்குளம் கண்மாய் பகுதிக்கு அவர்கள் சென்றிருந்தனர். அங்குள்ள வயல்வெளியில் காட்டுப்பன்றிகளிடம் இருந்து பயிர்களை பாதுகாக்க மேலே செல்லும் மின்கம்பியில் இருந்து சட்ட விரோதமாக மர்ம நபர், கொக்கி மூலம் திருட்டு மின்சாரம் எடுத்து, அதற்கான ஒயரை அங்கே போட்டு இருந்ததாக தெரிகிறது. அந்த ஒயரை எதிர்பாராதவிதமாக பெத்துராஜ் மிதித்துள்ளார். அப்போது, மின்சாரம் பாய்ந்து சம்பவ இடத்திலேயே அவர் பலியானார்.

உடன் சென்ற அவருடைய நண்பர்கள் இதைப்பார்த்து அதிர்ச்சி அடைந்தனர். பின்னர் இதுகுறித்து அளித்த தகவலி்ன்பேரில், விரைந்து வந்த அபிராமம் போலீசார் பெத்துராஜ் உடலை கைப்பற்றி, கமுதி அரசு மருத்துவமனைக்கு பிரேத பரிசோதனைக்கு அனுப்பி வைத்தனர். சம்பவம் பற்றி போலீசார் வழக்குப்பதிவு செய்து விசாரணை நடத்தி வருகின்றனர்.