அடுத்தடுத்து 2 கடைகளில் பணம் திருட்டு

கொள்ளிடம் அருகே அடுத்தடுத்து 2 கடைகளில் பணம் திருட்டு நடந்துள்ளது. இதுதொடர்பாக போலீசார் விசாரணை நடத்தி வருகிறார்கள்.

காய்கறி-கோழிக்கடை

மயிலாடுதுறை மாவட்டம் கொள்ளிடம் அருகே புத்தூர் கடை வீதியில் ஒரு காய்கறி கடை உள்ளது. நேற்று முன்தினம் இரவு இந்த கடையின் முன்பக்க ஷட்டரை உடைத்து உள்ளே புகுந்த மர்ம நபர் ஒருவர் கடையில் கல்லாவில் இருந்த ரூ.3 ஆயிரத்தை திருடி சென்றார். அதேபோல் அருகில் உள்ள ஒரு கோழிக்கடையிலும் அதே மர்ம நபர் ரூ.2 ஆயிரத்தை திருடிச்சென்றார். அடுத்தடுத்து இந்த 2 கடைகளிலும் மர்ம நபர் உள்ளே நுழைந்து திருடும் காட்சிகள் அங்கு உள்ள கண்காணிப்பு கேமராவில் பதிவாகி உள்ளன.

போலீசார் விசாரணை

கொள்ளிடத்தில் இருந்து சீர்காழி செல்லும் தேசிய நெடுஞ்சாலையில் உள்ள புத்தூர் கடை வீதி மக்கள் நடமாட்டம் மிகுந்த பகுதியாகும்.

இந்த நிலையில் அங்கு உள்ள 2 கடைகளில் திருட்டு நடைபெற்று இருப்பது அந்த பகுதியில் பரபரப்பை ஏற்படுத்தி உள்ளது. இதுகுறித்து கொள்ளிடம் போலீசார் விசாரணை நடத்தி வருகிறார்கள்.