தனியார் பள்ளியில் ரூ.1.68 லட்சம் திருட்டு

நெல்லை அருகே உள்ள முன்னீர்பள்ளம் ஆரைக்குளத்தை சேர்ந்தவர் ஜோசப். இவரின் மனைவி மாலினி (வயது 42). இவர் பாளையங்கோட்டை பெருமாள்புரம் ராமசந்திராபுரத்தில் உள்ள தனியார் பள்ளியில் முதல்வராக பணியாற்றி வருகிறார்.

கடந்த சில நாட்களுக்கு முன்பு பள்ளியின் அலுவலக அறையில் இருந்த பீரோ திறந்து கிடந்துள்ளது. அங்கு பார்த்த போது பீரோவில் இருந்த சுமார் ரூ.1 லட்சத்து 68 ஆயிரத்தை மர்மநபர் திருடிச் சென்றிருப்பது தெரியவந்தது.

இதுகுறித்து அவர் நேற்று முன்தினம் பெருமாள்புரம் போலீஸ் நிலையத்தில் புகார் செய்தார். அதன்பேரில் போலீசார் வழக்குப்பதிவு செய்தனர். தொடர்ந்து இந்த திருட்டில் ஈடுபட்ட மர்மநபர் குறித்து அந்த பகுதிகளில் உள்ள கண்காணிப்பு கேமரா காட்சிகளை ஆய்வு செய்து வருகிறார்கள்.