குடியிருப்பில் 'லிப்ட்' அறுந்து தொங்கியதால் பரபரப்பு

குளச்சல்,

குளச்சலில் பயணியர் விடுதி சந்திப்பு அருகே 4 மாடிகள் கொண்ட அடுக்கு மாடி குடியிருப்பு உள்ளது. இங்கு முதல் தளத்தில் வங்கியும், 2-வது தளத்தில் பர்னிச்சர் கடையும் செயல்பட்டு வருகிறது. 3 மற்றும் 4-வது தளத்தில் குடியிருப்புகள் உள்ளன. இந்த கட்டிடத்தில் உள்ள பர்னிச்சர் கடை மற்றும் அடுக்குமாடி குடியிருப்புகளுக்கு பர்னிச்சர் உள்ளிட்ட கனரக பொருட்களை மேலே எடுத்து செல்ல விடுதியின் பக்கவாட்டில் வெளிப்புறமாக சரக்கு லிப்ட் அமைக்கப்பட்டுள்ளது.

நேற்று மாலையில் 3-வது மாடியில் உள்ள குடியிருப்பு பகுதிக்கு பர்னிச்சர் பொருட்களை அந்த லிப்ட் வழியாக ஏற்றும் பணியில் ஊழியர்கள் ஈடுபட்டனர். அப்போது எடை தாங்காமல் அந்த லிப்ட் கப்பியில் இருந்து விலகி அறுந்து அந்தரத்தில் தொங்கியது. அதில் இருந்த பர்னிச்சர் பொருட்கள் சிதறி கீழே சாலையில் விழுந்தன. அப்போது சாலையில் யாரும் இல்லாததால் அதிர்ஷ்டவசமாக பெரும் விபத்து தவிர்க்கப்பட்டது.

இதுகுறித்து தகவல் அறிந்த நகராட்சி அதிகாரிகள் சம்பவ இடத்துக்கு வந்து ஆபத்தான நிலையில் தொங்கிய லிப்ட்டை அகற்றி எடுத்து சென்றனர். இந்த சம்பவத்தால் அந்த பகுதியில் சுமார் 1½ மணி நேரம் பரபரப்பு ஏற்பட்டது.