வீட்டின் கதவை உடைத்து நகை, பணம் திருட்டு

கீரனூரை அடுத்துள்ள வடக்குப்பட்டியை சேர்ந்தவர் சாந்தி அம்மாள் (வயது 68). இவர் நேற்று முன்தினம் தனது வீட்டை பூட்டிவிட்டு கோபிசெட்டிபாளையத்தில் உள்ள மகள் வீட்டிற்கு சென்றார். இந்தநிலையில் அவரது வீட்டின் கதவு உடைக்கப்பட்டு இருப்பதாக அப்பகுதி மக்கள் கொடுத்த தகவலின் பேரில் சாந்தி அம்மாள் தனது வீட்டிற்கு வந்தார். பின்னர் வீட்டின் உள்ளே சென்று பார்த்தபோது பீரோவில் வைத்திருந்த செயின், மோதிரம், தோடு உள்பட 5 பவுன் தங்க நகைகள் மற்றும் ரூ.2 ஆயிரத்தை மர்ம ஆசாமிகள் திருடி சென்றது தெரியவந்தது. இந்த சம்பவம் குறித்து அவர் அளித்த புகாரின் பேரில் கீரனூர் போலீசார் வழக்குப்பதிவு செய்து தப்பி ஓடிய மர்ம ஆசாமிகளை வலைவீசி தேடி வருகின்றனர்.