மோட்டார் சைக்கிள் மீது கார் மோதி வியாபாரி பலி; உறவினர்கள் சாலை மறியல்

அறந்தாங்கி என்.ஜி.ஓ. காலனியை சேர்ந்தவர் மாதவன் (வயது 48). இவர் பினாயில் வியாபாரம் செய்து வந்தார். நேற்று முன்தினம் வழக்கம்போல் தனது மோட்டார் சைக்கிளில் மீமிசல் அருகே உள்ள சித்திரவிடகம் என்ற இடத்தில் வியாபாரம் செய்து கொண்டு இருந்தார். அப்போது அந்த வழியாக சென்ற கார் மோட்டார் சைக்கிள் மீது மோதியது. இதில் பலத்த காயம் அடைந்த மாதவனை அந்த வழியாக சென்ற வாகன ஓட்டிகள் மீட்டு சிகிச்சைக்காக அறந்தாங்கி அரசு மருத்துவமனையில் சேர்த்தனர். பின்னர் மேல் சிகிச்சைக்காக புதுக்கோட்டை அரசு மருத்துவக்கல்லூரிக்கு கொண்டு சென்றனர். ஆனால் செல்லும் வழியிலேயே மாதவன் பரிதாபமாக இறந்தார்.

இதையடுத்து, விபத்தை ஏற்படுத்தியவரை கைது செய்யக்கோரி அவரது உறவினர்கள் அறந்தாங்கி-பட்டுக்கோட்டை சாலையில் மறியலில் ஈடுபட்டனர். இதனால் அப்பகுதியில் போக்குவரத்து பாதிக்கப்பட்டது. இந்த சம்பவம் குறித்து தகவல் அறிந்த மீமிசல் இன்ஸ்பெக்டர் பிரேம்குமார் சம்பவ இடத்திற்கு விரைந்து ெசன்று அவர்களிடம் பேச்சுவார்த்தை நடத்தினர். இதில் சமாதானம் அடைந்த அவர்கள் அங்கிருந்து கலைந்து சென்றனர். இந்த சம்பவம் காரணமாக அப்பகுதியில் சிறிது நேரம் பரபரப்பு ஏற்பட்டது.