யு.பி.எஸ்.சி. தேர்வில் வி.ஐ.டி. முன்னாள் மாணவர் 5-ம் இடம் பிடித்து சாதனை

சமீபத்தில் இந்திய அளவில் நடைபெற்ற யு.பி.எஸ்.சி. தேர்வில் வி.ஐ.டி.யில் 2014-ம் ஆண்டு பி.டெக் மெக்கானிக்கல் என்ஜினீயரிங் படித்த உத்தரப்பிரதேசத்தை சேர்ந்த உத்கர்ஷ் திவேதி இந்திய அளவில் 5-ம் இடம் பிடித்துள்ளார். வெற்றி குறித்து உத்கர்ஷ் திவேதி கூறுகையில், யு.பி.எஸ்.சி. தேர்வில் வெற்றிபெற்றது மகிழ்ச்சியாக உள்ளது. இந்த தருணத்தில் இறைவன், பெற்றோர், குடும்பம், ஆசிரியர் ஆகியோருக்கு நன்றி தெரிவித்துக் கொள்கிறேன். குடிமைப் பணியால்தான் நாட்டில் மாற்றத்தை உருவாக்கி மக்களுக்கு உதவிட முடியும். அதே போல் சமுதாயத்தில் என்னால் முடிந்த பணிகள் மூலம் நாட்டின் வளர்ச்சி பாதைக்கு உதவுவேன். கல்லூரி காலத்தில் என்னை வாழ்க்கையில் பல்வேறு நிலைக்கு வி.ஐ.டி. உயர்த்தி சென்றது.

இங்கு உள்ள பல மாணவ அமைப்புகளில் உறுப்பினராக சேர்ந்து அவற்றின் வாயிலாக நடைபெறும் நிகழ்ச்சிகளின் மூலம் தலைமை பண்பை வளர்த்துக்கொண்டேன். என்னுடைய கல்லூரி காலத்தில் கடினமான உழைப்பின் மூலம் வாழ்வில் உயரலாம் என வி.ஐ.டி.யில் அறிந்து கொண்டேன்.

இவ்வாறு அவர் கூறினார்.

தேர்வில் வெற்றிபெற்ற முன்னாள் மாணவரை, வி.ஐ.டி. வேந்தர் ஜி.விசுவநாதன் பாராட்டி, மேலும் பல சாதனைகள் புரிய வேண்டும் என வாழ்த்தினார்.