கிராம நிர்வாக அலுவலர்கள் கவன ஈர்ப்பு ஆர்ப்பாட்டம்

ஸ்ரீரங்கம்:

தமிழ்நாடு கிராம நிர்வாக அலுவலர்கள் முன்னேற்ற சங்கம் சார்பில் நேற்று ஸ்ரீரங்கம் தாசில்தார் அலுவலகம் முன் கவன ஈர்ப்பு ஆர்ப்பாட்டம் நடைபெற்றது. ஆர்ப்பாட்டத்திற்கு ஸ்ரீரங்கம் வட்ட தலைவர் விக்னேஷ் தலைமை தாங்கினார். கோரிக்கைகளை விளக்கி வட்ட செயலாளர் ஆனந்தகுமார், வட்ட பொருளாளர் கலைவாணி, மாவட்ட அமைப்பு செயலாளர் நாராயணன் ஆகியோர் பேசினர். பழைய ஓய்வூதிய திட்டத்தை உடனடியாக நடைமுறைபடுத்த வேண்டும். மத்திய அரசுக்கு இணையாக அகவிலைப்படி போன்றவற்றை உடனடியாக வழங்க வேண்டும். பயணப்படியை ரூ.2 ஆயிரமாக உயர்த்தி வழங்க வேண்டும். கருணை அடிப்படையில் பணி நியமனம் பெற்ற கிராம நிர்வாக அலுவலர்களுக்கு காலதாமதம் இன்றி பணி வரன்முறை செய்ய வேண்டும் என்பன உள்ளிட்ட பல்வேறு கோரிக்கைகளை வலியுறுத்தி இந்த ஆர்ப்பாட்டம் நடைபெற்றது. இதில் ஏராளமான கிராம நிர்வாக அலுவலர்கள் கலந்து கொண்டனர்.