தோட்டக்கலைத் துறை சார்பில் வழங்கப்படும் நலத்திட்டங்கள் என்னென்ன?

நாகர்கோவில்:

குமரி மாவட்டத்தில் தோட்டக்கலைத்துறை சார்பில் வழங்கப்படும் நலத்திட்டங்கள் என்னென்ன? என்பது குறித்து கலெக்டர் அரவிந்த் விளக்கம் அளித்துள்ளார்.

தோட்டக்கலைத்துறையின் சார்பில் வழங்கப்படும் நலத்திட்டங்கள் குறித்து குமரி மாவட்ட கலெக்டர் அரவிந்த் வெளியிட்டுள்ள செய்திக்குறிப்பில் கூறியிருப்பதாவது:-

மரக்கன்றுகள்- பழக்கன்றுகள்

குமரி மாவட்டத்தில் தோட்டக்கலை துறையின் கீழ் பல்வேறு திட்டங்கள் செயல்படுத்தப்பட்டு வருகின்றன. இதில் ஏராளமான விவசாயிகள் பயனடைந்து வருகின்றனர். அதிகரித்து வரும் காளான் தேவையை பூர்த்தி செய்திடவும், பெண் விவசாயிகள் காளான் வளர்ப்பில் ஈடுபட்டு அதிக லாபம் ஈட்டவும், தினசரி வருமானம் பெற்றிடவும் ஏதுவாக 2021 - 2022 மற்றும் 2022 - 2023-ம் நிதியாண்டுகளில் மொத்தமாக ரூ.9.50 லட்சத்தில் 17 பயனாளிகள் காளான் வளர்ப்புக் கூடம் அமைத்து பயன் பெற்றுள்ளனர்.

கலைஞரின் அனைத்து கிராம ஒருங்கிணைந்த வேளாண் வளர்ச்சி திட்டத்தின் கீழ் (2021-2022) ரூ.1.06 லட்சம் மதிப்பில் வீட்டுத் தோட்ட தளைகள் அமைக்க 2375 பயனாளிகளுக்கு வினியோகிக்கப்பட்டுள்ளது. பாரம்பரிய தோட்டக்கலை பயிர்களுக்கு 95 பயனாளிகளுக்கு ரூ.1.90 லட்சம் மதிப்பில் மானியம் வழங்கப்பட்டுள்ளது. 1000 பயனாளிகளுக்கு ரூ.1 லட்சம் மதிப்பில் வரப்பு ஓரங்களில் பழக்கன்றுகள் மற்றும் மரக்கன்றுகள் நடுவதற்கு வினியோகம் என மொத்தம் 3470 பயனாளிகளுக்கு ரூ.3.96 லட்சம் மதிப்பில் திட்டங்கள் வழங்கப்பட்டுள்ளது.

அறுவடை பின்செய் மேலாண்மை

மேலும் ஒருங்கிணைந்த தோட்டக்கலை அபிவிருத்தி திட்டத்தின் கீழ் 2021 -2022 காய்கறி விதை தளைகள், மாடித் தோட்ட தளைகள், ஊட்டச்சத்து தளை, முட்டுக் கொடுத்தல், காளான் வளர்ப்பு குடில், பயிர் ஊக்கத் தொகை, நெகிழி கூடைகள், அலுமினிய ஏணி, பழம் அறுவடை செய்ய பயன்படும் வலைக் கருவி, மலர் அறுவடைக்கான முகப்பு விளக்கு, கவாத்து கத்தரி ஆகியவை 6943 பயனாளிகளுக்கு ரூ.33.92 லட்சம் மதிப்பில் வழங்கப்பட்டுள்ளது.

தேசிய தோட்டக்கலை இயக்க திட்டத்தின் கீழ் (2021-2022) உயர்ரக காய்கறிகள் விரிவாக்கம், அவகேடோ பரப்பு விரிவாக்கம், பலா பரப்பு விரிவாக்கம், நறுமண பயிர்கள் விரிவாக்கம் (மிளகு, கிராம்பு, ஜாதிக்காய்), டிராகன் பழம் பரப்பு விரிவாக்கம், பண்ணை குட்டை அமைத்தல் என 423 பயனாளிகளுக்கு ரூ.67.71 லட்சம் மதிப்பில் பரப்பு விரிவாக்கம் செய்யவும், பசுமை குடில், ஒருங்கிணைந்த ஊட்டச்சத்து மேலாண்மை, அங்கக வேளாண்மை முதலாம் ஆண்டு, அங்கக வேளாண்மை இரண்டாம் ஆண்டு, மண்புழு படுக்கை என 241 பயனாளிகளுக்கு ரூ.14.33 லட்சம் மதிப்பில் பாதுகாக்கப்பட்ட சாகுபடி மேற்கொள்ளவும், தேனீ குடும்பங்கள், தேனீ பெட்டிகள், தேனீவளர்ப்பு உபகரணங்கள் என 300 பயனாளிகளுக்கு ரூ.24 லட்சம் மதிப்பில் தேனீவளர்ப்பின் மூலம் அயல் மகரந்த சேர்க்கையை ஊக்குவிக்கவும், வாழைத்தார் உறை, சிப்பம் கட்டும் அறை என 168 பயனாளிகளுக்கு ரூ.22.50 லட்சம் மதிப்பில் ஒருங்கிணைந்த அறுவடை பின்செய் மேலாண்மை மேற்கொள்ளவும் திட்டங்கள் வழங்கப்பட்டுள்ளது.

இவ்வாறு அதில் கூறப்பட்டுள்ளது.