கார் மோதி பெண் சாவு

ஒரத்தநாடு:

ஒரத்தநாடு அருகே கார் மோதி பெண் பரிதாபமாக இறந்தார்.

கார் மோதியது

கரூர் மாவட்டம் குளித்தலை சின்னையன்பாளையம் மெயின் ரோடு பகுதியை சேர்ந்தவர் மாணிக்கம். இவரது மனைவி பக்ரி அம்மாள் (வயது 51). நேற்று இவர் தனது சொந்த ஊரான ஒரத்தநாட்டை அடுத்துள்ள மேலஉளூரில் நடந்த கோவில் விழாவிற்காக வந்திருந்தார்.

அப்போது பக்ரி அம்மாள் ஒரத்தநாட்டிற்கு சென்று வீட்டிற்கான பொருட்களை வாங்கிக்கொண்டு தஞ்சை-பட்டுக்கோட்டை சாலையில் நடந்து சென்று கொண்டிருந்தார். மேலஉளூர் நடைபாலம் அருகே சென்று கொண்டிருந்தபோது, அந்த வழியே வந்த கார் எதிர்பாராதவிதமாக பக்ரி அம்மாள் மீது மோதியது.

பெண் சாவு

இதில் படுகாயம் அடைந்த அவரை அக்கம், பக்கத்தினர் மீட்டு தஞ்சை அரசு மருத்துவக்கல்லூரி ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பலனின்றி பக்ரி அம்மாள் பரிதாபமாக இறந்தார்.

இதுகுறித்து ஒரத்தநாடு போலீசார் வழக்குப்பதிவு செய்து விசாரணை நடத்தி வருகின்றனர்.