கார் மோதி பெண் பலி

வாடிப்பட்டி,

வாடிப்பட்டி அருகே போடிநாயக்கன்பட்டி திடீர் நகரை சேர்ந்தவர் முருகன். இவருடைய மனைவி சுமதி (வயது 40). இவர் நேற்று காலை 9.45 மணிக்கு ஆண்டிபட்டிக்கு தனது மகன் தமிழரசனுடன் கூலி வேலைக்கு சென்றார். இருவரும் சாலையோரம் நடந்து சென்ற போது எதிர்பாராத விதமாக திண்டுக்கல்லில் இருந்து மதுரை நோக்கி சென்ற அடையாளம் தெரியாத கார் சுமதி மீது மோதியது. இதில் தலையில் ரத்த காயம் ஏற்பட்டு சம்பவ இடத்திலேயே பரிதாபமாக உயிரிழந்தார். தன் கண்முன்னே தாய் இறந்ததை பார்த்த தமிழரசன் கதறி அழுதது பார்க்க பரிதாபமாக இருந்தது. இது சம்பந்தமாக வாடிப்பட்டி போலீஸ் இன்ஸ்பெக்டர் கனகசபாபதி சப்-இன்ஸ்பெக்டர் முருகேசன் ஆகியோர் வழக்கு பதிவு செய்து விசாரித்து வருகிறார்கள்.