லாரி மோதி பெண் பலி

திட்டக்குடி,

திட்டக்குடி அருகே கோழியூரை சேர்ந்தவர் கல்யாணராமன். இவரது மனைவி அஞ்சலை (வயது 33) என்பவர் தனது மாடுகளை மேய்ச்சலுக்காக ஓட்டிக்கொண்டு சென்றார். அதே பகுதியில் உள்ள பஸ் நிறுத்தம் அருகில் சென்றபோது, அந்த வழியாக வந்த லாரி ஒன்று அஞ்சலை மீது மோதியது. இதில் பலத்த காயமடைந்த அவர் சிகிச்சைக்காக திட்டக்குடி அரசு மருத்துவனையில் அனுமதிக்கப்பட்டார். பின்னர் மேல்சிகிச்சைக்காக பெரம்பலூர் அரசு மருத்துவமனையில் சேர்க்கப்பட்டார். தொடர்ந்து அங்கிருந்து மேல்சிகிச்சைக்காக திருச்சி அரசு மருத்துவமனைக்கு அனுப்பி வைக்கப்பட்டார். ஆனால் மருத்துவமனைக்கு செல்லும் வழியிலேயே அவர் பரிதாபமாக இறந்தார். இந்த விபத்து குறித்த புகாரின் பேரில் திட்டக்குடி போலீசார் வழக்குப்பதிவு செய்து விபத்துக்கு காரணமான திட்டக்குடி அடுத்த கொட்டாரம் கிராமத்தை சேர்ந்த பாண்டுரங்கன் மகன் ராஜீவ் காந்தி என்பவரை கைது செய்து விசாரணை நடத்தி வருகின்றனர்.