மோட்டார் சைக்கிள் மோதி பெண் பலி

பெரம்பலூர் நகர்ப்பகுதியான சங்குபேட்டை அம்பேத்கர் தெருவை சேர்ந்தவர் கண்ணையன். இவரது மனைவி தனம் (வயது 55). இவர் நேற்று வேப்பந்தட்டை தாலுகா, அயன்பேரையூர் சமத்துவபுரத்தில் வசிக்கும் உறவினா் வீட்டிற்கு சென்றார். பின்னர் இரவு பெரம்பலூருக்கு திரும்பி செல்வதற்காக பஸ் ஏற பஸ் நிறுத்தத்திற்கு நடந்து சென்று கொண்டிருந்தார். அப்போது திருச்சி-சென்னை தேசிய நெடுஞ்சாலையை கடக்க முயன்ற போது, அந்த வழியாக வந்த மோட்டார் சைக்கிள் தனம் மீது மோதியது. இதில் படுகாயமடைந்த தனத்தை அக்கம், பக்கத்தினர் மீட்டு சிகிச்சைக்காக பெரம்பலூர் அரசு மருத்துவமனையில் சேர்த்தனர். ஆனால் அங்கு சிகிச்சை பலனின்றி தனம் பரிதாபமாக உயிரிழந்தார். இது தொடர்பாக மங்களமேடு போலீசார் வழக்குப்பதிவு செய்து விசாரணை நடத்தி வருகின்றனர்.