பெண்களிடம் 10 பவுன் நகை பறிப்பு

மதுரையில் வெவ்வேறு சம்பவங்களில் பெண்களிடம் 10 பவுன் நகை பறிக்கப்பட்டது.

பெண்ணிடம் நகை பறிப்பு

மதுரை கருப்பாயூரணி மீனாட்சி நகரை சேர்ந்தவர் மனோகரன். இவரது மனைவி சசிரேகா (வயது 46). சம்பவத்தன்று இவர் கோமதிபுரம் மேலமடையில் ஒரு மருத்துவமனை அருகே மோட்டார் சைக்கிளில் சென்று கொண்டிருந்தார். அப்போது அவரை மோட்டார் சைக்கிளில் 2 பேர் பின் தொடர்ந்து வந்தனர்.

அவர்கள் திடீரென்று சசிரேகா அணிந்திருந்த 7 பவுன் தங்கச் சங்கிலியை பறித்துச் சென்று விட்டனர். இந்த சம்பவம் குறித்து சசிரேகா மாட்டுத்தாவணி போலீசில் புகார் செய்தார்.போலீசார் வழக்கு பதிவு செய்து சங்கிலி பறித்த மோட்டார் சைக்கிள் ஆசாமிகளை தேடி வருகின்றனர்.

கணவருடன் சென்றவரிடம்...

மதுரை கோரிப்பாளையம் ஜம்ரோபுரம் முதல் தெருவை சேர்ந்தவர் லெனின் மனைவி ரேகா (37). சம்பவத்தன்று இவர் தனது கணவருடன் மோட்டார் சைக்கிளில் பின்னால் அமர்ந்து சென்று கொண்டிருந்தார். அப்போது 2 பேர் அவர்களை மோட்டார் சைக்கிளில் பின்தொடர்ந்து வந்தனர். விளாங்குடி அருகே சென்ற போது ரேகா அணிந்திருந்த 3 பவுன் நகையை அவர்கள் பறித்து கொண்டு தப்பி விட்டனர். இது குறித்த புகாரின் பேரில் கூடல்புதூர் போலீசார் வழக்குப்பதிவு செய்து விசாரணை நடத்தி வருகிறார்கள்.

மதுரையில் ஒரே நாளில் வெவ்வேறு சம்பவங்களில் 2 பெண்களிடம் 10 பவுன் நகையை மோட்டார் சைக்கிள் கொள்ளையர்கள் பறித்து சென்றனர். அவர்களை போலீசார் தீவிரமாக தேடி வருகிறார்கள்.