மாடிப்படியில் இருந்து தவறி விழுந்து தொழிலாளி சாவு

வேலூர் அருகே உள்ள விரிஞ்சிபுரம் தபால் நிலைய தெருவை சேர்ந்தவர் காசிநாதன் (வயது 56). இவர் அங்குள்ள ஓட்டல் ஒன்றில் வேலை பார்த்து வந்தார். காசிநாதன் நேற்று முன்தினம் வீட்டின் மாடியில் நின்று கொண்டிருந்த அவருடைய தங்கையின் மகனை அழைத்து வருவதற்காக படிக்கட்டுகள் வழியாக மாடிக்கு ஏறினார்.

அப்போது அவர் எதிர்பாராத விதமாக படிக்கட்டில் இருந்து தவறி கீழே விழுந்தார். இதில் பலத்த காயமடைந்த அவரை குடும்பத்தினர் மீட்டு சிகிச்சைக்காக அடுக்கம்பாறை அரசு மருத்துவமனையில் அனுமதித்தனர். அங்கு தீவிர சிகிச்சை அளித்தும் பலனின்றி அவர் பரிதாபமாக இறந்தார்.

இதுகுறித்து விரிஞ்சிபுரம் போலீசார் வழக்குப்பதிந்து விசாரணை நடத்தி வருகின்றனர்.

காசிநாதன் திருமணம் செய்து கொள்ளவில்லை என்பது குறிப்பிடத்தக்கது.