தொழிலாளி மர்ம சாவு

சமயபுரம்:

மண்ணச்சநல்லூர் அருகே உள்ள தில்லாம்பட்டி கிழக்கு தெருவை சேர்ந்தவர் சரவணன்(வயது 40). ஒரு ஓட்டலில் தொழிலாளியாக வேலை பார்த்து வந்த இவர் சமீபகாலமாக வேலைக்கு செல்லவில்லை என்று தெரிகிறது. இந்நிலையில் நேற்று முன்தினம் மாலை அவர் மது அருந்திவிட்டு வீட்டுக்கு வந்து தூங்கியதாக கூறப்படுகிறது. இதற்கிடையே வேலைக்கு சென்றிருந்த அவரது மனைவி பிரியா வீட்டிற்கு வந்துள்ளார். அப்போது சரவணன் அசைவற்ற நிலையில் கிடந்ததால் சந்தேகம் அடைந்த பிரியா, அக்கம் பக்கத்தில் உள்ளவர்களிடம் இது பற்றி கூறியுள்ளார். அவர்கள் வந்து பார்த்தபோது சரவணன் இறந்து கிடந்தது தெரியவந்தது.

மேலும் அவரது உடல் முழுவதும் காயங்கள் இருந்ததாக கூறப்படுகிறது. இது குறித்த தகவல் அறிந்த மண்ணச்சநல்லூர் போலீஸ் இன்ஸ்பெக்டர் ரமேஷ்குமார் மற்றும் போலீசார் சம்பவ இடத்திற்கு சென்று விசாரணை நடத்தினர். மேலும் அவரது உடலை கைப்பற்றி பிரேத பரிசோதனைக்காக ஸ்ரீரங்கம் அரசு மருத்துவமனைக்கு அனுப்பி வைத்தனர். இந்த சம்பவம் குறித்து போலீசார் வழக்குப்பதிவு செய்து, சரவணனின் சாவுக்கான காரணம் என்ன? என்பது குறித்து விசாரணை நடத்தி வருகின்றனர்.