போலீஸ் சப்-இன்ஸ்பெக்டர் பணிக்கு எழுத்து தேர்வு

நெல்லை மாவட்டத்தில் போலீஸ் சப்-இன்ஸ்பெக்டர் பணிக்கான எழுத்து தேர்வை 6,603 பேர் எழுதினர்.

சப்-இன்ஸ்பெக்டர் பணி

தமிழ்நாடு சீருடை பணியாளர் தேர்வாணையம் சார்பில் நேரடி போலீஸ் சப்-இன்ஸ்பெக்டர் பணியில் காலியாக உள்ள 444 பணியிடங்களுக்கான தேர்வு நேற்று தமிழகம் முழுவதும் நடைபெற்றது.

நெல்லை மாவட்டத்தில் நெல்லை வண்ணார்பேட்டை பிரான்சிஸ் சேவியர் பொறியியல் கல்லூரி, அரசு பொறியியல் கல்லூரி, புஷ்பலதா வித்யா மந்திர் பள்ளி, வி.எம்.சத்திரம் ரோஸ்மேரி மெட்ரிகுலேஷன் பள்ளி, சங்கர்நகர் ஜெயேந்திர சரஸ்வதி சுவாமிகள் மெட்ரிகுலேஷன் பள்ளி, பாளையங்கோட்டை ஜான்ஸ் மேல்நிலைப்பள்ளி, சதக்கத்துல்லா அப்பா கல்லூரி, கதிட்ரல் மேல்நிலைப்பள்ளி உள்பட 10 மையங்களில் நடைபெற்ற இந்த தேர்வுக்காக 7 ஆயிரத்து 918 பேர் விண்ணப்பித்து இருந்தனர்.

ஏற்கனவே சப்-இன்ஸ்பெக்டர் தரத்திற்கு கீழே உள்ள போலீசாருக்கும் குறைவான இடங்கள் ஒதுக்கப்பட்டு இருந்ததால் அவர்களும் தேர்வு எழுத விண்ணப்பித்திருந்தனர்.

6,603 பேர் எழுதினர்

மாவட்டத்தில் ஆண் தேர்வர்களுக்கு 8 மையங்களும், பெண் தேர்வர்களுக்கு 2 மையங்களும் ஒதுக்கப்பட்டு இருந்தது. காலை 8.30 மணி முதலே தேர்வர்கள் அனைவரும் தேர்வறைக்குள் அனுமதிக்கப்பட்டனர். 10 மணிக்கு பின்னர் வந்த தேர்வர்கள் யாரும் உள்ளே அனுமதிக்கப்படவில்லை.

7 ஆயிரத்து 918 பேர் விண்ணப்பித்து இருந்தநிலையில் 6 ஆயிரத்து 603 பேர் தேர்வு எழுதினர். 1,315 பேர் தேர்வு எழுத வரவில்லை.

தேர்வையொட்டி அனைத்து மையங்களிலும் மாவட்ட போலீஸ் சூப்பிரண்டு சரவணன் ஆய்வு செய்தார். மேலும் மையங்களில் 3 கூடுதல் போலீஸ் சூப்பிரண்டுகள், 7 துணை போலீஸ் சூப்பிரண்டுகள் தலைமையில் சுமார் 800 பேர் பாதுகாப்பு பணியில் ஈடுபட்டிருந்தனர். அழைப்பு கடிதம், புகைப்படத்துடன் கூடிய அடையாள அட்டை, ஊதா அல்லது கருப்பு பந்துமுனை பேனா ஆகியவை மட்டுமே கொண்டு செல்ல அனுமதி வழங்கப்பட்டது. மையங்களில் தேர்வர்கள் யாரும் செல்போன் உள்ளிட்ட எலக்ட்ரானிக் பொருட்கள் கொண்டு செல்ல அனுமதிக்கப்படவில்லை.