மோட்டார் சைக்கிளில் செம்மரக் கட்டைகள் கடத்திய வாலிபர் கைது

குடியாத்தம் தாலுகா போலீஸ் சப்-இன்ஸ்பெக்டர் சிலம்பரசன் உள்ளிட்ட போலீசார் குடியாத்தம் அடுத்த சின்னாலபல்லி பகுதியில் ரோந்து சென்றனர். அப்போது அந்த வழியாக மோட்டார் சைக்கிளில் சாக்கு மூட்டையுடன் வந்த வாலிபரை நிறுத்தி விசாரணை செய்தனர். விசாரணையில் அவர் குடியாத்தம் அடுத்த மூங்கப்பட்டு கிராமத்தைச் சேர்ந்த ரங்கநாதன் மகன் சுரேஷ் (வயது 29) என்பதும், பால் கறக்கும் தொழிலாளி என்பதும் தெரியவந்தது.

அவர் கொண்டுவந்த மூட்டையை சோதனை செய்தபோது அதில் செம்மரக்கட்டைகள் இருந்தது தெரியவந்தது. இதனையடுத்து 8 கிலோ செம்மரக்கட்டைகள், மோட்டார் சைக்கிளை பறிமுதல் செய்து குடியாத்தம் வனச்சரக அலுவலர் சரவணபாபுவிடம் போலீசார் ஒப்படைத்தனர்.

அதன்பேரில் வனத்துறையினர் வழக்குப்பதிவு செய்து சுரேசை கைது செய்தனர். இந்த செம்மரக் கட்டைகளை சுரேஷ் எங்கிருந்து கொண்டு வந்தார், எங்கே கொண்டு சென்றார் என்பது குறித்து வனத்துறையினர் விசாரணை நடத்தி வருகின்றனர்.