துணி துவைத்து,தோசை சுட்டு , டீ போட்டு வாக்காளர்களை கவர புதுப்புது முறைகளைக் கையாளும் வேட்பாளர்கள்

குஷ்பு குலாம் அபாஸ் அலிகான் பகுதியில் தீவர பிரச்சாரத்தில் குஷ்பு ஈடுபட்டார். ஓட்டு கேட்டு வந்த குஷ்புவை பார்த்த காதல் தம்பதிகளான முஸ்தபா - சலீன் ரீட்டா அவரை தங்களது வீட்டிற்கு வந்து தேனீர் அருந்த அழைத்தனர். அவர்களுக்கு மதிப்பளித்த குஷ்பு முஸ்தபா வீட்டிற்கு சென்றது மட்டுமின்றி, சமையலறைக்குள் நுழைந்து டீ தயாரித்தார். பிரச்சாரத்திற்கு வந்த குஷ்பு தங்கள் வீட்டில் டீ போடுவதை ஆச்சர்யத்துடன் முஸ்தபா குடும்பத்தினர் பார்த்தனர்.பின்னர் அனைவருக்கும் சிரித்த முகத்துடன் டீ கொடுத்த குஷ்பு தனக்கு வாக்களிக்கும்படி கேட்டுக் கொண்டார்.

விருகம்பாக்கம் திமுக வேட்பாளர் பிரபாகர ராஜா தேர்தல் பிரசாரத்தின் போது ஒரு ஓட்டலில் தோசை சுட்டு வாக்கு சேகரித்தார்.

கும்பகோணம் சட்டமன்ற தொகுதியில் களமிறங்கியுள்ள அதிமுக கூட்டணி வேட்பாளர், சிலம்பம் சுற்றி தனது திறமையை நிரூபித்த நிலையில், திமுக வேட்பாளரோ கொரோனா வரும் முன் காக்கும் விதமாக வீடு வீடாக மாஸ்க் கொடுத்து வாக்கு சேகரிப்பில் ஈடுபட்டு வருகின்றார்.

அதிமுக கூட்டணியில் கும்பகோணம் சட்டமன்ற தொகுதி வேட்பாளராக மூவேந்தர் முன்னேற்ற கழக தலைவர் ஸ்ரீதர்வாண்டையார் இரட்டை இலை சின்னத்தில் போட்டியிடுகின்றார்.

அசூர் ஊராட்சியில் வாக்கு சேகரிப்பில் ஈடுபட்ட ஸ்ரீதர்வாண்டையார் சிலம்பத்தை சுற்றி தனது திறமையை நிரூபித்து மக்களிடம் வாக்கு சேகரித்தார்.அதே நேரத்தில் கும்பகோணம் தொகுதி திமுக வேட்பாளர் சாக்கோட்டை அன்பழகன், முககவசம் கையுறை அணிந்தபடி தனது ஆதர்வாளர்களுடன் வீடு வீடாக சென்று வாக்கு சேகரித்தார். அனைவரிடமும் துண்டுபிரசுரம் மட்டுமல்லாமல் ஆளுக்கு ஒரு முககவசத்தையும் வழங்கினார்.

கூட்டத்தில் முககவசம் அணியாமல் நின்றிருந்த சிறுவர் சிறுமிகளுக்கு சாகோட்டை அன்பழகன் மாஸ்க் அனிந்துவிட்டதோடு, தஞ்சை மாவட்டத்தில் கொரோனா பரவல் அதிகரித்துள்ளதால் விழிப்புணர்வோடு இருக்க வேண்டும் என்று மக்களுக்கு விழிப்புணர்வு ஏற்படுத்தினார்..!