தேசிய செய்திகள்

குடியுரிமை திருத்த சட்டத்தை எதிர்த்து மேற்கு வங்காளத்தில் 5 ரெயில்களுக்கு தீ வைப்பு - 15 பஸ்களும் கொளுத்தப்பட்டன + "||" + Oppose the Citizenship Amendment bill 5 trains set on fire in West Bengal - 15 buses burned

குடியுரிமை திருத்த சட்டத்தை எதிர்த்து மேற்கு வங்காளத்தில் 5 ரெயில்களுக்கு தீ வைப்பு - 15 பஸ்களும் கொளுத்தப்பட்டன

குடியுரிமை திருத்த சட்டத்தை எதிர்த்து மேற்கு வங்காளத்தில் 5 ரெயில்களுக்கு தீ வைப்பு - 15 பஸ்களும் கொளுத்தப்பட்டன
குடியுரிமை திருத்த சட்டத்துக்கு எதிராக மேற்கு வங்காளத்தில் போராட்டங்கள் தீவிரமடைந்துள்ளன. அங்கு 5 ரெயில்களுக்கு தீ வைத்த போராட்டக்காரர்கள், 15 பஸ்களையும் கொளுத்தினர்.
கொல்கத்தா,

பாகிஸ்தான், ஆப்கானிஸ்தான், வங்காளதேசம் போன்ற நாடுகளில் இருந்து 2014-ம் ஆண்டுக்கு முன்பு இந்தியாவுக்கு வந்து குடியேறிய முஸ்லிம் அல்லாதவர்களுக்கு குடியுரிமை வழங்க மத்திய அரசு முடிவு செய்துள்ளது. இதற்காக குடியுரிமை திருத்த சட்டம் ஒன்றை நாடாளுமன்றத்தில் இயற்றி உள்ளது.


இந்த சட்டத்தால் சட்டவிரோத குடியேறிகளின் எண்ணிக்கை மேலும் அதிகரிக்கும் என வடகிழக்கு மாநிலங்களில் அச்சம் ஏற்பட்டு உள்ளது. எனவே இந்த சட்டத்தை எதிர்த்து கடந்த சில நாட்களாக அங்கு தீவிர போராட்டங்கள் நடந்து வருகின்றன. இந்த போராட்டம் மேற்கு வங்காளத்திலும் பரவியது.

அங்குள்ள முர்ஷிதாபாத், வடக்கு 24 பர்கானாக்கள், ஹவுரா உள்ளிட்ட மாவட்டங்களில் நேற்றும் நடந்த போராட்டங்களில் வன்முறை மூண்டது. குறிப்பாக வடக்கு மற்றும் தெற்கு வங்காளத்தை இணைக்கும் தேசிய நெடுஞ்சாலை எண் 34 உள்ளிட்ட சாலைகளில் மறியலில் ஈடுபட்ட போராட்டக்காரர்கள் ஏராளமான வாகனங்களுக்கு தீ வைத்தனர். ஹவுரா உள்ளிட்ட பகுதிகளில் சுமார் 15 பஸ்கள் மட்டுமே தீயிட்டு கொளுத்தப்பட்டன.

ஹவுராவின் தோம்ஜூர் பகுதியில் சாலைகளில் டயர்களை கொளுத்தியும், வாகனங்களை அடித்து நொறுக்கியும் போராட்டக்காரர்கள் வன்முறையில் ஈடுபட்டனர். அப்போது பிரதமர் நரேந்திர மோடி, உள்துறை மந்திரி அமித்ஷா ஆகியோரின் உருவ பொம்மைகளும் எரிக்கப்பட்டன.

மேலும் அங்குள்ள சங்ரயில் ரெயில் நிலையத்தில் புகுந்த ஒரு கும்பல், அங்கே பாதுகாப்புக்கு நின்றிருந்த வீரர்களை தாக்கிவிட்டு ரெயில் நிலையத்துக்கு தீ வைத்தனர். இதனால் அருகில் உள்ள சில கடைகளும் தீயில் எரிந்து நாசமாயின. இதைப்போல உலுபேரியா ரெயில் நிலையம், முர்ஷிதாபாத்தின் நிமித்தா ரெயில் நிலையங்களுக்கும் தீ வைக்கப்பட்டன.

இந்த போராட்டத்தின் மையமாக விளங்கிய முர்ஷிதாபாத் மாவட்டத்தில் போராட்டக்காரர்கள் அரசு சொத்துகளை சேதப்படுத்தி வெறியாட்டத்தில் ஈடுபட்டனர். குறிப்பாக கிருஷ்ணாபூர் ரெயில் நிலையத்தில் நிறுத்திவைக்கப்பட்டிருந்த 4 ரெயில்களை தீ வைத்து எரித்தனர். இது குறித்து தகவல் அறிந்து விரைந்து வந்த தீயணைப்பு வாகனங்களையும் தடுத்து அவர்கள் கோஷமிட்டதால், ரெயில்கள் முற்றிலும் எரிந்து சேதமடைந்தன.

இதைப்போல உலுபேரியா ரெயில் நிலையத்தில் நிறுத்தப்பட்டிருந்த எக்ஸ்பிரஸ் ரெயில் ஒன்றையும் போராட்டக்காரர்கள் அடித்து நொறுக்கி தீ வைத்தனர்.

சேண்டலியா, காக்ரா மிர்ஷாபூர் ரெயில் நிலையங்களில் ஏராளமானோர் தண்டவாளத்தில் அமர்ந்து போராட்டத்தில் ஈடுபட்டனர். இதைப்போல மாநிலம் முழுவதும் பல இடங்களில் ரெயில் மறியல் போராட்டங்கள் நடந்ததால் ரெயில் சேவை வெகுவாக பாதிக்கப்பட்டது. இதனால் 30-க்கும் மேற்பட்ட நீண்டதூர ரெயில்கள் மற்றும் புறநகர் ரெயில்கள் என ஏராளமான ரெயில்களை கிழக்கு ரெயில்வே ரத்து செய்தது.

தீவிர போராட்டங்களால் மாநிலம் முழுவதும் பதற்றம் நிலவி வரும் நிலையில், மக்களை அமைதி காக்குமாறு முதல்-மந்திரி மம்தா பானர்ஜி, கவர்னர் மற்றும் ஏராளமான பிரபலங்கள் கோரிக்கை விடுத்து உள்ளனர். குடியுரிமை திருத்த சட்டம் மற்றும் தேசிய குடிமக்கள் பதிவேடு போன்றவற்றை மேற்கு வங்காளத்தில் அமல்படுத்தமாட்டோம் என்றும் மம்தா பானர்ஜி உறுதியளித்து உள்ளார்.

இதற்கிடையே குடியுரிமை சட்டத்துக்கு எதிராக அசாமில் நேற்றும் போராட்டங்கள் நடந்தன. எனினும் சில இடங்களில் போராட்டங்கள் ஓய்ந்து நிலைமை மேம்பட்டதால், தலைநகர் கவுகாத்தி, திப்ரூகர் உள்ளிட்ட இடங்களில் போடப்பட்டு இருந்த ஊரடங்கு உத்தரவு நேற்று பகலில் விலக்கப்பட்டது.

இதனால் மக்கள் அதிக அளவில் கடைத்தெரு, சந்தைகள் போன்ற பகுதிகளுக்கு சென்றதை பார்க்க முடிந்தது. மேலும் பெட்ரோல் விற்பனை நிலையங்கள், ஏ.டி.எம். வாசல்களில் நீண்ட வரிசையில் மக்கள் காத்திருந்தனர். சாலையில் ஆட்டோ மற்றும் சைக்கிள் ரிக்‌ஷாக்கள் மட்டுமே இயங்கின. பள்ளிகள் மற்றும் அலுவலகங்கள் அனைத்தும் நேற்றும் மூடப்பட்டு இருந்தன. அசாமில் கடந்த 11-ந் தேதி முதல் இணையதள சேவை முடக்கப்பட்டு இருப்பது குறிப்பிடத்தக்கது.

இதைப்போல மேகாலயா தலைநகர் ஷில்லாங்கில் போடப்பட்டு இருந்த ஊரடங்கு உத்தரவு நேற்று காலை 10 முதல் இரவு 7 மணி வரை விலக்கப்பட்டது. அசாம் போராட்டத்தால் தங்கள் மாநிலத்துக்கு அத்தியாவசிய பொருட்கள் வருவது தடை பட்டிருப்பதாக மாநில அரசு கவலை வெளியிட்டு உள்ளது. எனவே இது தொடர்பாக உள்துறை மந்திரி அமித்ஷாவிடம் அரசு கோரிக்கை விடுத்துள்ளது.

நாகா மாணவர் கூட்டமைப்பு சார்பில் நாகாலாந்தில் நேற்று காலை 6 மணி முதல் 12 மணி வரை முழு அடைப்பு போராட்டம் நடந்தது. இதனால் வர்த்தக நிறுவனங்கள், கல்வி நிறுவனங்கள் என அனைத்தும் மூடப்பட்டன. வாகனங்கள் ஓடாததால் மக்களின் இயல்பு வாழ்க்கை பாதிக்கப்பட்டது.

குடியுரிமை திருத்த சட்டத்துக்கு எதிராக ஜனநாயக முறையில் போராடுவது என கூட்டு இயக்கம் அறிவித்து உள்ளதால் திரிபுராவில் நேற்று சற்று அமைதி திரும்பியது. எனினும் வடக்கு திரிபுராவின் கஞ்சன்பூர், கந்தர்கெரா போன்ற பகுதிகளில் தொடரும் போராட்டங்களால் பதற்றம் நிலவி வருகிறது.


தொடர்புடைய செய்திகள்

1. குடியுரிமை திருத்த சட்டத்தை வாபஸ் பெறக்கோரி கேரளாவில் 620 கி.மீ. நீள மனித சங்கிலி
குடியுரிமை திருத்த சட்டத்தை வாபஸ் பெறக்கோரி கேரளாவில் 620 கி.மீ. நீள மனித சங்கிலி போராட்டம் நடந்தது.
2. குடியுரிமை திருத்த சட்டம் மறுபரிசீலனை: மத்திய அரசுக்கு, தேவேகவுடா வலியுறுத்தல்
குடியுரிமை திருத்த சட்டத்தை மறுபரிசீலனை செய்ய வேண்டும் என்று மத்திய அரசை தேவேகவுடா வலியுறுத்தியுள்ளார்.
3. குடியுரிமை திருத்த சட்டத்துக்கு எதிராக ஐரோப்பிய யூனியன் எம்.பி.க்கள் தீர்மானம்: நாடாளுமன்றத்தில் தாக்கல் ஆகிறது
குடியுரிமை திருத்த சட்டத்துக்கு எதிராக ஐரோப்பிய யூனியன் எம்.பி.க்களின் தீர்மானம் நாடாளுமன்றத்தில் தாக்கல் செய்யப்பட உள்ளது.
4. விழுப்புரத்தில், குடியுரிமை திருத்த சட்டத்தை திரும்ப பெறக்கோரி பேரணி - ஆயிரக்கணக்கான முஸ்லிம்கள் கலந்து கொண்டனர்
விழுப்புரத்தில் குடியுரிமை திருத்த சட்டத்தை திரும்ப பெறக்கோரி பேரணி நடைபெற்றது. இதில் ஆயிரக்கணக்கான முஸ்லிம்கள் கலந்து கொண்டனர்.
5. குடியுரிமை திருத்த சட்டத்திற்கு எதிராக கையெழுத்து இயக்கம் - திமுக தோழமை கட்சிகள் முடிவு
குடியுரிமை திருத்த சட்டத்திற்கு எதிராக கையெழுத்து இயக்கம் நடத்த திமுக தோழமை கட்சிகள் கூட்டத்தில் முடிவு செய்யப்பட்டுள்ளது.