மாநில செய்திகள்

நெல் மூட்டைகளை பாதுகாத்து விவசாயிகளின் வாழ்க்கையை காப்பாற்ற வேண்டும்; தமிழக அரசுக்கு, மு.க.ஸ்டாலின் வலியுறுத்தல் + "||" + To protect paddy bundles and save the lives of farmers; MK Stalin demand

நெல் மூட்டைகளை பாதுகாத்து விவசாயிகளின் வாழ்க்கையை காப்பாற்ற வேண்டும்; தமிழக அரசுக்கு, மு.க.ஸ்டாலின் வலியுறுத்தல்

நெல் மூட்டைகளை பாதுகாத்து விவசாயிகளின் வாழ்க்கையை காப்பாற்ற வேண்டும்; தமிழக அரசுக்கு, மு.க.ஸ்டாலின் வலியுறுத்தல்
பருவமழையால் பாழ்படும் நெல் மூட்டைகளை பாதுகாத்து விவசாயிகளின் வாழ்க்கையையும், நலனையும் காப்பாற்றித்தரவேண்டும் என்று தமிழக அரசுக்கு, மு.க.ஸ்டாலின் வலியுறுத்தியுள்ளார்.
சென்னை,

தி.மு.க. தலைவர் மு.க. ஸ்டாலின் வெளியிட்டுள்ள அறிக்கையில் கூறியிருப்பதாவது:-

முப்போகம் விளைந்த நிலமெல்லாம் ஒரு போக விளைச்சலுக்கே போராடி திண்டாடிக்கொண்டிருக்கும் நிலையில், விளைந்த நெல்லையும் முறையாக கொள்முதல் செய்யாமல் விவசாயிகளின் வயிற்றில் அடிக்கும் வகையில் அலட்சியம் காட்டி வருகிறது எடப்பாடி பழனிசாமி தலைமையிலான அ.தி.மு.க. அரசு. நெல் கொள்முதல் நிலையங்களை அதிக அளவில் திறந்திருப்பதாக அரசு சொன்னாலும், அவை உரிய வசதிகளுடனும் பாதுகாப்புடனும் இருப்பதில்லை. கடலூர் மாவட்டத்தில் 22 நெல் கொள்முதல் நிலையங்கள் திறக்கப்பட்டதாக அரசு தரப்பில் அறிவிக்கப்பட்டபோதும், 11 நிலையங்கள் மட்டுமே இயங்கி வருகின்றன.

இதில் ராஜேந்திரபட்டணம் என்ற இடத்தில் உள்ள நெல் கொள்முதல் நிலையத்திற்கு சுற்றுவட்டார கிராமத்து விவசாயிகள் தங்கள் வயலில் விளைந்த நெல்லை மூட்டை மூட்டையாக கொண்டு வந்த நிலையில், அதனை உடனடியாக கொள்முதல் செய்வதற்கு வழியின்றி அங்கேயே அடுக்கி வைக்கச் செய்துள்ளது தமிழ்நாடு நுகர்பொருள் வாணிபக்கழகம்.

அடுக்கி வைக்கப்பட்ட மூட்டைகளை மூடுவதற்கு தார்பாய், ‘பிளாஸ்டிக் ஷீட்’ போன்றவை போதிய அளவில் இல்லாததாலும், வெறுந்தரையிலேயே மூட்டைகளை அடுக்கியதாலும், அண்மையில் பெய்த கனமழையால், 20 ஆயிரத்துக்கும் அதிகமான நெல் மூட்டைகள் மழையில் நனைந்து வீணாகியுள்ளன. கடலூர் மாவட்டத்தில் மட்டுமின்றி தமிழகத்தின் பல மாவட்டங்களிலும் இந்த அவலம் தொடர்கிறது.

200-க்கும் அதிகமான அளவில் அரசு திறந்துள்ள நேரடி கொள்முதல் நிலையங்கள் பலவற்றுக்கு நிரந்தர கட்டிடம் கிடையாது. இதனால் விவசாயிகள் பாடுபட்டு விளைவித்த நெல்லை சாலையோரத்தில் அடுக்கி வைத்து, கொள்முதல் நிலையத்தின் அழைப்புக்காக காத்திருக்கவேண்டிய அவலம் தொடர்கிறது.

ஆண்டுக்கு ஒரு முறை மட்டுமே அறுவடையை பார்க்கும் நெல் விவசாயிகள், அந்த அறுவடையில் கிடைத்த கண்மணிகளுக்கு இணையான நெல்மணிகள் வீணாவதை கண்ணீர் வழிந்தோட காணும் நிலைக்கு தள்ளப்படுவது வேதனையிலும் வேதனையாகும். விவசாயி, விவசாயி என்று மூச்சுக்கு முந்நூறு தடவை தன்னைத்தானே கூறிக்கொள்ளும் முதல்-அமைச்சர் எடப்பாடி பழனிசாமிக்கு, உண்மையான விவசாயிகளின் வாழ்வாதார போராட்டம் பற்றிய கவனமும் இல்லை, கவலையும் இல்லை. இதனை அவர் பார்வைக்கு கொண்டு வந்து, உரிய நடவடிக்கை எடுக்கச் செய்யவேண்டிய கடமையும் பொறுப்பும் எதிர்க்கட்சிக்கு இருக்கிறது. பருவமழையால் பாழ்படும் நெல் மூட்டைகளை பாதுகாத்து, அவற்றை விரைவாக கொள்முதல் செய்து, விவசாயிகளின் வாழ்க்கையையும் நலனையும் உரிய நேரத்தில் காப்பாற்றித் தரவேண்டும்.  இவ்வாறு அவர் கூறியுள்ளார்.