மாநில செய்திகள்

‘நீட்’ தேர்வில் இருந்து நிரந்தர விலக்கு பெற சட்டசபையில் இன்று மசோதா தாக்கல் + "||" + Tamil Nadu government to pass resolution in Assembly against NEET on September 13

‘நீட்’ தேர்வில் இருந்து நிரந்தர விலக்கு பெற சட்டசபையில் இன்று மசோதா தாக்கல்

‘நீட்’ தேர்வில் இருந்து நிரந்தர விலக்கு பெற சட்டசபையில் இன்று மசோதா தாக்கல்
மாணவர்கள் விபரீத முடிவு எடுக்க வேண்டாம் என்றும், ‘நீட்’ தேர்வில் இருந்து நிரந்தர விலக்கு பெறும் மசோதா இன்று தாக்கல் செய்யப்படும் என்று முதல்-அமைச்சர் மு.க.ஸ்டாலின் கூறியுள்ளார்.
சென்னை, 

மாணவர்கள் விபரீத முடிவு எடுக்க வேண்டாம் என்றும், ‘நீட்’ தேர்வில் இருந்து நிரந்தர விலக்கு பெறும் மசோதா இன்று தாக்கல் செய்யப்படும் என்று முதல்-அமைச்சர் மு.க.ஸ்டாலின் கூறியுள்ளார்.

இதுகுறித்து முதல்-அமைச்சர் மு.க.ஸ்டாலின் வெளியிட்டுள்ள அறிக்கையில் கூறியிருப்பதாவது:-

‘நீட்’ தேர்வு அச்சம் காரணமாக தனுஷ் என்ற மாணவர் தற்கொலை செய்துகொண்டுள்ள செய்தியறிந்து மிகுந்த அதிர்ச்சியும் வேதனையும் அடைந்தேன். அந்த மாணவருக்கு அஞ்சலி செலுத்தி, அவரது பெற்றோர் மற்றும் உறவினர் களுக்கும் ஆழ்ந்த இரங்கலை தெரிவித்து கொள்கிறேன்.

2 முறை தேர்வு எழுதியும் தேர்ச்சி பெற முடியாத அளவுக்கு கிராமப்புற - நகர்ப்புற ஏழை மாணவர்களுக்கு ‘நீட்’ தேர்வு பாதிப்பை ஏற்படுத்துவதால், மனமுடைந்து தனுஷ் தற்கொலை செய்து கொண்டுள்ளார். ‘நீட்’ தேர்வு மாணவர்களுக்கு ஏற்படுத்தும் மிகப்பெரிய சிரமங்களை புரிந்து கொள்ளாத மத்திய அரசின் அலட்சியமும், பிடிவாதமும் இந்தியாவின் நம்பிக்கை நட்சத்திரங்களாக வர வேண்டிய மாணவ - மாணவிகள் தற்கொலைக்கு காரணமாக தொடர்ந்து அமைந்து வருகிறது.

‘நீட்’ தேர்வில் முறைகேடு, கேள்வித்தாள் ‘லீக்’, ஆள்மாறாட்டம் உள்ளிட்ட பல்வேறு மோசடிகளும், மாணவ - மாணவிகள் தற்கொலைகளும் மத்திய அரசின் மனதை மாற்றவில்லை என்பது, கல்வி மாநில பட்டியலுக்கு வந்தே தீர வேண்டும் என்ற அவசியத்தை மேலும் மேலும் வலுவடைய வைக்கிறது.

இந்தநிலையில் ஆட்சி பொறுப்பேற்ற பிறகு, ‘நீட்’ தேர்வுக்கு எதிரான நமது சட்டப் போராட்டம் இப்போது தொடங்குகிறது. இன்று (திங்கட்கிழமை) தமிழ்நாடு சட்டமன்றத்தில் ‘நீட்’ தேர்வில் இருந்து நிரந்தர விலக்கு பெறும் மசோதா நிறைவேற இருக்கிறது. இதனை இந்திய துணைக்கண்டத்தின் பிரச்சினையாக கருதி அனைத்து மாநில முதல்-மந்திரிகளின் கவனத்துக்கும் கொண்டு சென்று ஆதரவு திரட்டி, வெற்றி பெறுவோம் என்ற நம்பிக்கை இருக்கிறது.

மாணவச்செல்வங்கள் மனம் தளர வேண்டாம். சிறந்த எதிர்காலத்தை உங்களுக்கு அமைத்துத்தரும் பெரும் பொறுப்பும் கடமையும் இந்த அரசுக்கு இருக்கிறது. அந்த பொறுப்பை உணர்ந்து, ‘நீட்’ தேர்வை மத்திய அரசு நீக்கும்வரை நமது சட்டரீதியான போராட்டம் தொடரும் என்று தெரிவித்துக் கொள்கிறேன். ஆகவே, மாணவர்கள் யாரும் விபரீத முடிவுகள் எடுக்க வேண்டாம் என்று அன்புடன் வேண்டுகோள் விடுகிறேன்” இவ்வாறு அவர் கூறியுள்ளார்.