உலக செய்திகள்

மாலத்தீவு அதிபர் பதவி ஏற்பு விழாவில் பிரதமர் மோடி பங்கேற்பு + "||" + Maldives President swearing in ceremony Prime Minister Modi's participation

மாலத்தீவு அதிபர் பதவி ஏற்பு விழாவில் பிரதமர் மோடி பங்கேற்பு

மாலத்தீவு அதிபர் பதவி ஏற்பு விழாவில் பிரதமர் மோடி பங்கேற்பு
மாலத்தீவு அதிபராக இப்ராகிம் முகமது சோலிஹ் நேற்று பதவி ஏற்றுக் கொண்டார். இந்த விழாவில் பிரதமர் மோடியும் பங்கேற்றார்.
மாலி,

இந்திய பெருங்கடல் பகுதியில் இந்தியாவிற்கு அருகே அமைந்துள்ள குட்டித்தீவு நாடு மாலத்தீவு. இங்கு கடந்த செப்டம்பர் மாதம் 23-ந் தேதி நடந்த அதிபர் தேர்தலில் அப்போதைய அதிபர் அப்துல்லா யாமீனை, மாலத்தீவு ஜனநாயக கட்சியின் வேட்பாளர் இப்ராகிம் முகமது சோலிஹ் தோற்கடித்தார்.


சீனாவின் ஆதரவு பெற்ற அப்துல்லா யாமீன், பிரபல எதிர்க்கட்சி தலைவர்களை சிறையில் அடைத்து அவர்களை தேர்தலில் போட்டியிட முடியாமல் தடுத்தார். மேலும் அவரை எதிர்க்க முடியாமல் பல தலைவர்கள் நாட்டிலிருந்து தலைமறைவாகி விட்டனர்.

எனினும், இரண்டாம் நிலை தலைவரான 54 வயது இப்ராகிம் முகமது, அதிக ஓட்டுகள் வித்தியாசத்தில் யாமீனை தோற்கடித்து உலக நாடுகளை ஆச்சரியப்படுத்தினார். அவர் மாலத்தீவு அதிபராக பதவி ஏற்கும் நிகழ்ச்சி மாலி நகரில் நேற்று நடந்தது.

இதில் கலந்துகொள்வதற்காக இப்ராகிம் முகமது ஏற்கனவே பிரதமர் மோடிக்கு அழைப்பும் விடுத்து இருந்தார். அதை ஏற்றுக்கொண்ட மோடி நேற்று மாலத்தீவு சென்றார். பிரதமராக பதவி ஏற்ற பிறகு மோடி அந்நாட்டுக்கு செல்வது இதுவே முதல்முறை ஆகும்.

மோடிக்கு தலைநகர் மாலியில் உள்ள சர்வதேச விமான நிலையத்தில் சிவப்பு கம்பள வரவேற்பு அளிக்கப்பட்டது. அவரை விமான நிலையத்தில் மாலத்தீவு நாடாளுமன்ற சபாநாயகர் அப்துல்லா மசிஹ் முகமது வரவேற்று அழைத்துச் சென்றார்.

மாலியில் உள்ள தேசிய கால்பந்து மைதானத்தில் பதவி ஏற்பு விழா நடந்தது. அங்கு கூடியிருந்த ஆயிரக்கணக்கான மக்கள் முன்னிலையில் மாலத்தீவின் 7-வது அதிபராக இப்ராகிம் முகமது பதவி ஏற்றுக்கொண்டார். அப்போது 21 குண்டுகள் முழங்க அவருக்கு ராணுவ மரியாதையும் அளிக்கப்பட்டது.

விழாவில் மோடியை கவுரவிக்கும் விதமாக மாலத்தீவு முன்னாள் அதிபர்கள் முகமது நசீத், மமூன் அப்துல் கயூம் ஆகியோருக்கு அருகில் அவருக்கு இருக்கை ஒதுக்கப்பட்டிருந்தது. இந்த நிகழ்ச்சியில் இலங்கை முன்னாள் அதிபர் சந்திரிகா குமாரதுங்காவும் பங்கேற்றார்.

மாலத்தீவுக்கு பயணமாகும் முன்பு மோடி அடுத்தடுத்து வெளியிட்ட தனது டுவிட்டர் பதிவில், “புதிய அதிபருக்கு வாழ்த்துகள். மாலத்தீவின் வளர்ச்சிக்கு இந்தியா உறுதுணையாக இருக்கும். குறிப்பாக உள்கட்டமைப்பு, சுகாதாரம், தொலைத்தொடர்பு, மனித வள மேம்பாடு ஆகியவற்றுக்கு முன்னுரிமை கொடுக்கும். மாலத்தீவில் நடந்த தேர்தல் மக்களின் ஜனநாயக உணர்வையும், நாட்டில் சட்டத்தின் ஆட்சிதான் நடைபெறவேண்டும் என்பதையும் வெளிப்படுத்துவதாக அமைந்திருந்தது” என்று குறிப்பிட்டு இருந்தார். 


தொடர்புடைய செய்திகள்

1. மாலத்தீவு : தேர்தல் முடிவை எதிர்த்த அதிபரின் மனு மீதான விசாரணை துவக்கம்
மாலத்தீவு அதிபர் தேர்தலில் தோல்வி அடைந்த அதிபர் அப்துல்லா யாமீன், தாக்கல் செய்த மனுவை அந்நாட்டு உச்ச நீதிமன்றம் விசாரணைக்கு எடுத்துக்கொண்டுள்ளது.
2. அதிபர் பதவியில் தொடர்ந்து நீடிக்க யாமீன் திட்டம்: மாலத்தீவு எதிர்க்கட்சிகள் குற்றச்சாட்டு
அதிபர் பதவியில் தொடர்ந்து நீடிக்க யாமீன் திட்டமிட்டுள்ளதாக மாலத்தீவு எதிர்க்கட்சிகள் குற்றம் சாட்டியுள்ளன.
3. மாலத்தீவு அதிபர் தேர்தல்: எதிர்க்கட்சி தலைவர் இப்ராகீம் முகம்மது வெற்றி
மாலத்தீவு தேர்தலில் அதிபர் அப்துல்லா யாமீன் தோல்வி அடைந்தார். அவரை எதிர்த்து போட்டியிட்ட இப்ராகீம் முகம்மது வெற்றி பெற்றார்.
4. மாலத்தீவு அதிபர் தேர்தலில் விறுவிறுப்பான ஓட்டுப்பதிவு
மாலத்தீவு அதிபர் தேர்தலில் ஓட்டுப்பதிவு விறுவிறுப்பாக நடந்தது. அதிபர் அப்துல்லா யாமீன் பதவியை தக்க வைப்பாரா? என்ற எதிர்பார்ப்பு நிலவுகிறது.
5. மாலத்தீவு விவகாரம்: சுப்ரமணியன் சுவாமியின் கருத்துக்கு மத்திய அரசு மறுப்பு
மாலத்தீவு விவகாரம் தொடர்பாக சுப்ரமணியன் சுவாமியின் கருத்து அவருடைய தனிப்பட்ட கருத்தாகும் என்று மத்திய அரசு தெரிவித்துள்ளது.