ரஷியாவில் மாயமான விமானத்தின் சிதைவுகள் கண்டுபிடிப்பு; பயணித்த 6 பேரும் பலி

ரஷியாவில் நேற்றுமுன்தினம் கப்ரோவ்ஸ்க் நகரத்தில் இருந்து 38 கி.மீ. தொலைவில் ஆன்டனோவ் ஆன்-26 ரக பயணிகள் விமானம் மாயமாகி விட்டதாக தூர கிழக்கு அதிகாரிகள் தெரிவித்தனர். இந்த விமானத்தில் 6 சிப்பந்திகள் பயணித்ததாக தகவல்கள் வெளியாகின. 70-க்கும் மேற்பட்ட மீட்பு படையினர் சம்பவ இடத்துக்கு அனுப்பி வைக்கப்பட்டனர்.

இந்தநிலையில் மாயமான விமானத்தின் சிதைவுகள், நேற்று கப்ரோவ்ஸ்க் பகுதியில் உள்ள ஸ்பார்டக் ஸ்கை ரிசார்ட்டுக்கு அருகே கண்டுபிடிக்கப்பட்டுள்ளதாக தகவல்கள் கூறுகின்றன. இதையடுத்து அந்த விமானம் விபத்தில் சிக்கியதும், அதில் பயணித்த 6 பேரும் பலியாகி விட்டதும் உறுதி செய்யப்பட்டுள்ளது. மோசமான வானிலையே இந்த விபத்துக்கு காரணம் என முதல் கட்ட தகவல்கள் கூறுகின்றன.