பேச்சுவார்த்தையா?, வேலைநிறுத்தமா?

தமிழ்நாட்டில் மட்டும் 41 சுங்கச்சாவடிகள் இருக்கின்றன. நெடுஞ்சாலைகளில் செல்லும்போது, இந்த சுங்கச்சாவடிகளில் வாகனத்தை நிறுத்தி கட்டணத்தைக்கட்டி, ரசீது வாங்கிக்கொண்டு மீண்டும் பயணத்தை தொடர வெகுநேரமாகிறது. இதனால் எரிபொருளும் வீணாக செலவாகிறது, காலதாமதமும் ஆகிறது. எனவே, சுங்கக்கட்டணமாக அவ்வப்போது ஒவ்வொரு பயணத்தின்போதும் கட்டணம் வசூலிக்கப்படுவதற்கு பதிலாக, நாங்கள் ரூ.18 ஆயிரம் கோடியை ஆண்டுக்கு ஒருமுறை சுங்கக்கட்டணமாக கட்டி விடுகிறோம்.

பெட்ரோல்-டீசல் விலையை தினமும் நிர்ணயிப்பதற்கு பதிலாக, 3 மாதங்களுக்கு ஒருமுறை நிர்ணயிக்க வேண்டும். இதை சரக்கு சேவைவரி வரம்புக்குள் கொண்டு வர வேண்டும். மோட்டார் வாகனங்களுக்கான 3-ம் நபர் காப்பீடு கட்டண உயர்வு ரத்து செய்யவேண்டும் என்று சொல்லி, நாடு முழுவதிலும் உள்ள ஏறத்தாழ 70 லட்சம் லாரி உரிமையாளர்கள் வேலைநிறுத்தத்தில் ஈடுபட்டனர். தமிழ்நாட்டில் மட்டும் 4½ லட்சம் லாரிகள் ஓடவில்லை. இதனால் சரக்கு சேவை பெரிதும் பாதிக்கப்பட்டது. அரசாங்கத்துக்கும் ஏராளமான வருமான இழப்பு ஏற்பட்டது. லாரி உரிமையாளர்களுக்கும் பெருத்த வருவாய் இழப்பு ஏற்பட்டது. 8 நாட்கள் போராட்டம் நடந்தது. 8 நாட்களும் மத்திய அரசாங்கம் கவலைப்படவில்லை. லாரி உரிமையாளர்களுக்கும் ஒரு சலிப்பு ஏற்பட்டது. இந்தநிலையில், மத்திய தரைவழி போக்குவரத்து துறை செயலாளருடன் நடந்த பேச்சுவார்த்தையை தொடர்ந்து, போராட்டத்தை வாபஸ் பெறுவதாக லாரி உரிமையாளர்கள் அறிவித்தனர். அவர்களது கோரிக்கைகள் எதுவும் நிறைவேறவில்லை.