தலையங்கம்

வாங்கும் சக்தி அதிகரிக்க வேண்டும் + "||" + Increase purchasing power

வாங்கும் சக்தி அதிகரிக்க வேண்டும்

வாங்கும் சக்தி அதிகரிக்க வேண்டும்
2 மாதங்களுக்கு ஒருமுறை ரிசர்வ் வங்கியின் நிதி கொள்கைக்குழு கூடி, ரெப்போ ரேட், ரிவர்ஸ் ரெப்போ ரேட் மற்றும் ஒட்டுமொத்த பொருளாதார உற்பத்தி வளர்ச்சி எப்படி இருக்கும்? என்பதை நிர்ணயிக்கிறது.
ரிசர்வ் வங்கி, வங்கிகளுக்கு கொடுக்கும் கடன்களுக்கான வட்டி விகிதமே ‘ரெப்போ ரேட்’ என்று அழைக்கப்படுகிறது. வங்கிகளிடம் இருந்து ரிசர்வ் வங்கி பெறும் பணத்துக்கு கொடுக்கப்படும் வட்டி ‘ரிவர்ஸ் ரெப்போ ரேட்’ என்று அழைக்கப்படுகிறது. தற்போதைய ரிசர்வ் வங்கியின் கவர்னராக சக்தி காந்ததாஸ் கடந்த ஆண்டு டிசம்பர் மாதம் 12–ந்தேதி பொறுப்பேற்றார். அதன்பிறகு கடந்த பிப்ரவரி மாதம் முதல் 5 முறை நிதி கொள்கைக்குழு கூடி ரெப்போ ரேட்டுக்கான வட்டியை நிர்ணயித்துள்ளது. 4 முறை 0.25 சதவீதம் வட்டி குறைக்கப்பட்டது. கடந்த ஆகஸ்டு மாதத்தில் மட்டும் 0.35 சதவீதம் வட்டி குறைப்பு அறிவிக்கப்பட்டது. 

கடந்த ஏப்ரல் முதல் ஜூன் வரையிலான காலக்கட்டத்தில் 6 ஆண்டுகளில் இல்லாத அளவு பொருளாதார வளர்ச்சி 5 சதவீதமாக குறைந்தது. தற்போது கடந்த 4–ந்தேதி ரிசர்வ் வங்கியின் நிதி கொள்கைக்குழு கூடி, அடுத்த 2 மாதங்களுக்கு ரெப்போ ரேட் விகிதத்தை மேலும் 0.25 சதவீதம் குறைத்ததன் மூலம் வட்டிவிகிதம் 5.15 சதவீதமாக குறைத்துள்ளது. கடந்த 9 ஆண்டுகளில் இல்லாத அளவு மிகக்குறைவான வட்டிவிகிதம் ரிசர்வ் வங்கியால் நிர்ணயிக்கப்பட்டுள்ளது. இதுபோல, இந்த நிதி ஆண்டில் இந்தியாவின் பொருளாதார வளர்ச்சி கடந்த 7 ஆண்டுகளில் இல்லாத அளவில் 6.1 சதவீதமாக இருக்கும் என்று நிர்ணயித்துள்ளது. பொருளாதார வளர்ச்சி 6.1 சதவீதமாக இருக்கும் என்று நிர்ணயிக்கப்பட்ட உடனேயே அதன் தாக்கம் பங்குச்சந்தையில் எதிரொலித்தது. இந்த வட்டிக்குறைப்பு செய்தும் பங்குச்சந்தையில் ஊக்கம் காணப்படவில்லை. மும்பை பங்குச்சந்தை குறியீட்டு எண் ‘சென்செக்ஸ்’ 434 புள்ளிகள் வீழ்ச்சி அடைந்தது. தேசிய பங்குச்சந்தை குறியீட்டு எண் ‘நிப்டி’ 139 புள்ளிகளை இழந்தது. இந்த வட்டிக்குறைப்பினால் வங்கிகள் அளிக்கும் வாகன கடன், வீட்டுவசதி கடன் போன்ற கடன்களுக்கான வட்டி குறைவதால், நிறையபேர் கடன் வாங்க முன்வருவார்கள். மேலும் உற்பத்தியும் அதிகரிக்கும், பொருளாதாரமும் உயரும் என்று எதிர்பார்க்கப்படுகிறது. ஆனால் கடந்த பிப்ரவரி மாதம் முதல் இதுவரை 1.35 சதவீத வட்டியை ரிசர்வ் வங்கி குறைத்திருந்தாலும், வங்கிகள் அந்த அளவு வட்டியை குறைக்கவில்லை. அது நடந்தால்தான் முழுபலன் கிடைக்கும். 

ஒரு நாட்டின் பொருளாதார வளர்ச்சிக்கு மோட்டார் வாகனத்தொழிலும், ரியல் எஸ்டேட் தொழிலும்தான் முக்கிய காரணமாகும். ஏனெனில், இந்த 2 தொழில்களிலும் ஏராளமான உபதொழில்கள் இருக்கின்றன. நாட்டில் தற்போது மோட்டார் வாகன உற்பத்தி வெகுவாக குறைந்துவிட்டது. ரியல் எஸ்டேட் துறையும் வரலாறு காணாத வீழ்ச்சி அடைந்துள்ளது. இதற்கு காரணம் மோட்டார் வாகனங்கள் வாங்குவதிலும், புதிய வீடுகள் வாங்குவதிலும் மக்களுக்கு ஆர்வம் இல்லாதநிலை ஏற்பட்டுள்ளது. அதற்கு விலையும் ஒரு அடிப்படை காரணமாகும். பொருளாதார வளர்ச்சியில் அரசாங்கம் எதிர்பார்க்கும் நோக்கம் நிறைவேற வேண்டும் என்றால், இந்த இரு துறையின் வளர்ச்சியிலும் அதிக அக்கறை காட்டவேண்டும். அதற்கு துணையாக இந்த இரு தொழில்களிலும் சம்பந்தப்பட்ட எல்லா பொருட்களுக்கும் சரக்கு சேவை வரியை குறைத்து சலுகைகள் அளித்தால், விலையும் குறைந்து மக்களும் வாங்க முன்வருவார்கள். விற்பனை பெருகும். அதன் காரணமாக உற்பத்தியும் பெருகும். பொருளாதார வளர்ச்சியும் ஏற்படும். மொத்தத்தில், மக்களின் வாங்கும் சக்தி அதிகரிக்க வேண்டும்.

தொடர்புடைய செய்திகள்

1. வணங்க வேண்டிய தலைவர்களின் சிலைகள்
இந்த உலகத்தில் இப்படியா வாழ்ந்தார்கள்? என்பதை நம்புவதற்கு கடினமாக இருக்கும் என்று சொல்லும் அளவுக்கு சொல்லுக்கும்–செயலுக்கும் இடைவெளி இல்லாமல் இருந்தவர்கள், இருவர். ஒருவர் காந்தியடிகள், இன்னொருவர் காமராஜர். இருவருமே பொதுவாழ்வில் எளிமை, தூய்மை, நேர்மை என்று வாழ்ந்தவர்கள்.
2. மகாபலிபுரத்தில் நெருக்கம் உருவாகுமா?
63 ஆண்டுகளுக்கு முன்பு அதாவது 6.12.1956 அன்று மகாபலிபுரத்துக்கு அன்றைய சீன பிரதமர் சூ என் லாய் வந்து அங்குள்ள சிற்பங்களை எல்லாம் பார்த்து ரசித்தார். குளிப்பந்தண்டலம் என்ற கிராமத்தில் விவசாயிகள் கட்டிய ஒரு மகப்பேறு குழந்தைகள் நல மையத்தை திறந்து வைத்தார். அந்த பகுதியில் உள்ள வயல்களை பார்த்த நேரத்தில், இருநாட்டு விவசாயிகளும் ஒன்றுபட்டு பாடுபடவேண்டும் என்று கூறினார்.
3. நிதி உதவி பெற விவசாயிகளே பதிவு செய்யலாம்
விவசாயம் நாடு முழுவதும் லாபகரமான தொழிலாக இருந்தால்தான், விவசாயிகளின் வாழ்வு வளம்பெறும். நாட்டின் பொருளாதாரமும் உயரும். அப்படிப்பட்ட விவசாயிகளின் வாழ்வில் இப்போது விளைபொருட்களுக்கு உரியவிலை கிடைக்காததால் பெருத்த வருமான இழப்பு ஏற்பட்டுள்ளது.
4. பாராட்டுக்குரிய இரு மாநில முதல்-அமைச்சர்கள்
கேரளா, கர்நாடகம், ஆந்திரா ஆகிய அண்டை மாநிலங்களோடு தமிழ்நாட்டுக்கு நீர் பங்கீடு தொடர்பான விவகாரங்கள் இருக்கின்றன. இந்த 4 மாநிலங் களுமே தென்னிந்திய சகோதரிகள் என்று அழைக்கப்படும் மாநிலங்களாகும்.
5. பாகிஸ்தான் பயங்கரவாதிகள் பயந்து ஓடவேண்டும்
காஷ்மீர் இந்தியாவின் ஓர் அங்கம். காஷ்மீருக்கு மட்டும் சிறப்பு அந்தஸ்து கொடுக்கும் அரசியல் சட்டம் 370-வது பிரிவு கடந்த ஆகஸ்டு மாதம் 5, 6-ந் தேதிகளில் நாடாளுமன்றத்தில் ரத்து செய்யப்பட்டது. இதை எதிர்த்து பாகிஸ்தான் கொக்கரிக்கிறது.

ஆசிரியரின் தேர்வுகள்...