ரஞ்சி கிரிக்கெட்டில் விதர்பாவுக்கு எதிரான அரைஇறுதி ஆட்டம்: தோல்வியின் விளிம்பில் கர்நாடகா

கொல்கத்தா,

ரஞ்சி கோப்பை கிரிக்கெட்டில் விதர்பாவுக்கு எதிரான அரைஇறுதி ஆட்டத்தில் கர்நாடகா அணி தோல்வியின் விளிம்பில் உள்ளது.

ரஞ்சி கிரிக்கெட்

ரஞ்சி கோப்பை கிரிக்கெட்டில், கர்நாடகம்-விதர்பா அணிகள் இடையிலான அரைஇறுதி ஆட்டம் கொல்கத்தாவில் நடந்து வருகிறது. இதில் முதல் இன்னிங்சில் முறையே விதர்பா 185 ரன்களும், கர்நாடகா 301 ரன்களும் எடுத்தன. 116 ரன்கள் பின்தங்கிய நிலையில் 2-வது இன்னிங்சை ஆடிய விதர்பா அணி 3-வது நாள் முடிவில் 47 ஓவர்களில் 4 விக்கெட் இழப்புக்கு 195 ரன்கள் எடுத்திருந்தது. கணேஷ் சதீஷ் 71 ரன்னுடனும், வாத்கர் 19 ரன்னுடனும் களத்தில் இருந்தனர்.

4-வது நாளான நேற்று தொடர்ந்து ஆடிய வாத்கர் 28 ரன்னிலும், கணேஷ் சதீஷ் 81 ரன்னிலும் வெளியேறினர். விதர்பா அணி 2-வது இன்னிங்சில் 84.1 ஓவர்களில் 313 ரன்களுக்கு ஆல்-அவுட் ஆனது. கடைசி விக்கெட்டாக ஆதித்ய சர்வாதே 55 ரன்னில் ஆட்டம் இழந்தார்.

இதையடுத்து 198 ரன்கள் எடுத்தால் வெற்றி என்ற இலக்குடன் கர்நாடக அணி 2-வது இன்னிங்சை ஆடியது. விதர்பா அணி வீரர்களின் பந்துவீச்சுக்கு ஈடுகொடுக்க முடியாமல் கர்நாடகாவின் விக்கெட்டுகள் மளமளவென சரிந்தன. நேற்றைய ஆட்ட நேரம் முடிவில் கர்நாடகா அணி 2-வது இன்னிங்சில் 43 ஓவர்களில் 7 விக்கெட் இழப்புக்கு 111 ரன்கள் எடுத்துள்ளது. முதல் இன்னிங்சில் சதம் அடித்த கருண்நாயர் 30 ரன்னிலும், சமர்த் 24 ரன்னிலும், கவுதம் 24 ரன்னிலும் ஆட்டம் இழந்தனர். கேப்டன் வினய்குமார் 19 ரன்னுடனும், ஸ்ரேயாஸ் கோபால் 1 ரன்னுடனும் களத்தில் இருக்கிறார்கள். விதர்பா அணி தரப்பில் குர்பானி 4 விக்கெட்டுகளை சாய்த்தார்.

தோல்வியின் விளிம்பில் கர்நாடகம்

இன்று 5-வது மற்றும் கடைசி நாள் ஆட்டம் நடக்கிறது. கர்நாடக அணியின் வெற்றிக்கு மேலும் 87 ரன்கள் எடுக்க வேண்டியது இருக்கிறது. அந்த அணி கைவசம் 3 விக்கெட் மட்டுமே உள்ளது. எனவே இந்த ஆட்டத்தில் கர்நாடக அணி தோல்வியின் விளிம்பில் நிற்கிறது. இதனால் விதர்பா அணி முதல்முறையாக இறுதிப்போட்டிக்கு முன்னேற பிரகாசமான வாய்ப்பு நிலவுகிறது.