ஜிம்பாப்வேக்கு எதிரான 4 நாள் டெஸ்ட்: தென்ஆப்பிரிக்க வீரர் மார்க்ராம் சதம்

போர்ட் எலிசபெத்,

தோள்பட்டை மற்றும் முதுகுவலியில் இருந்து மீண்டு வந்த தென்ஆப்பிரிக்க கேப்டன் பாப் டு பிளிஸ்சிஸ், கடந்த வாரம் வைரஸ் காய்ச்சலால் திடீரென பாதிக்கப்பட்டதால் அவரால் முழு உடல்தகுதியை எட்ட முடியவில்லை. இதனால் தென்ஆப்பிரிக்க அணியின் கேப்டன் பொறுப்பை டிவில்லியர்ஸ் ஏற்றார். மோர்னே மோர்கலுக்கு வாய்ப்பு வழங்கப்பட்டதால் ஸ்டெயினுக்கு இடம் கிடைக்கவில்லை.

‘டாஸ்’ ஜெயித்த தென்ஆப்பிரிக்கா முதலில் பேட்டிங் செய்தது. எய்டன் மார்க்ராமும், டீன் எல்கரும் இன்னிங்சை தொடங்கினர். நல்ல தொடக்கம் தந்த இந்த ஜோடி 72 ரன்களை (21.3 ஓவர்) எட்டிய போது பிரிந்தது. எல்கர் 31 ரன்களிலும், அடுத்து வந்த அம்லா 5 ரன்னிலும் கேட்ச் ஆனார்கள்.

இதன் பின்னர் மார்க்ராமுடன், கேப்டன் டிவில்லியர்ஸ் ஜோடி சேர்ந்தார். 2016–ம் ஆண்டு ஜனவரி மாதத்திற்கு பிறகு முதல் முறையாக டெஸ்ட் கிரிக்கெட்டில் கால்பதித்த டிவில்லியர்ஸ் தனது பங்குக்கு 53 ரன்கள் (65 பந்து, 5 பவுண்டரி, ஒரு சிக்சர்) எடுத்தார். தொடர்ந்து பவுமா ஆட வந்தார். இன்னொருபுறம் நிலைத்து நின்று அசத்திய மார்க்ராம் பவுண்டரி அடித்து தனது 2–வது சதத்தை பூர்த்தி செய்தார்.

60 ஓவர் முடிந்திருந்த போது தென்ஆப்பிரிக்க அணி முதல் இன்னிங்சில் 3 விக்கெட்டுக்கு 229 ரன்கள் எடுத்திருந்தது. மார்க்ராம் 111 ரன்களுடனும், பவுமா 27 ரன்களுடனும் ஆடிக்கொண்டிருந்தனர்.