நியூசிலாந்து அணி எளிதில் வெற்றி

நெல்சன்,

நியூசிலாந்து - வெஸ்ட் இண்டீஸ் அணிகள் இடையிலான முதலாவது 20 ஓவர் கிரிக்கெட் போட்டி நெல்சனில் நேற்று நடந்தது. இதில் முதலில் பேட் செய்த நியூசிலாந்து அணி 7 விக்கெட்டுக்கு 187 ரன்கள் குவித்தது. காலின் முன்ரோ (53 ரன், 37 பந்து, 6 பவுண்டரி, 2 சிக்சர்), விக்கெட் கீப்பர் கிளைன் பிலிப்ஸ் (55 ரன், 40 பந்து, 4 பவுண்டரி, 2 சிக்சர்) அரைசதம் விளாசினர். தொடர்ந்து ஆடிய வெஸ்ட் இண்டீஸ் அணி 19 ஓவர்களில் 140 ரன்களுக்கு ஆல்-அவுட் ஆனது. அதிகபட்சமாக ஆந்த்ரே பிளட்சர் 27 ரன்கள் எடுத்தார். ‘அதிரடி மன்னன்’ கிறிஸ் கெய்ல் 12 ரன்னில் கேட்ச் ஆகி ஏமாற்றம் அளித்தார். நியூசிலாந்து தரப்பில் புதுமுக வேகப்பந்து வீச்சாளர் சேத் ரான்ஸ், பொறுப்பு கேப்டன் டிம் சவுதி தலா 3 விக்கெட்டுகளை சாய்த்தனர். அரைசதம் அடித்ததுடன், 3 கேட்ச் மற்றும் ஒரு ஸ்டம்பிங் செய்த விக்கெட் கீப்பர் கிளைன் பிலிப்ஸ் ஆட்டநாயகனாக தேர்வு செய்யப்பட்டார்.

47 ரன்கள் வித்தியாசத்தில் வெற்றியை ருசித்த நியூசிலாந்து அணி 3 போட்டிகள் கொண்ட தொடரில் 1-0 என்ற கணக்கில் முன்னிலை வகிக்கிறது. 2-வது 20 ஓவர் போட்டி நாளை மறுதினம் நடக்கிறது.