இங்கிலாந்து-நியூசிலாந்து மோதும் பகல்-இரவு டெஸ்ட் இன்று தொடக்கம்

ஆக்லாந்து,

நியூசிலாந்துக்கு சென்றுள்ள இங்கிலாந்து கிரிக்கெட் அணி 2 போட்டிகள் கொண்ட டெஸ்ட் தொடரில் பங்கேற்கிறது. இதன் முதலாவது டெஸ்ட் போட்டி ஆக்லாந்தில் இன்று தொடங்குகிறது. இது பகல்-இரவு டெஸ்ட் போட்டியாகும். மின்னொளியின் கீழ் விளையாடப்படுவதால் இளஞ்சிவப்பு நிறப்பந்து (பிங்க்) பயன்படுத்தப்படும். நியூசிலாந்தில் பகல்-இரவு டெஸ்ட் அரங்கேறுவது இதுவே முதல் முறையாகும்.

இங்கிலாந்து அணி கடைசியாக ஆடிய 11 வெளிநாட்டு டெஸ்டுகளில் ஒன்றில் கூட ஜெயிக்கவில்லை. ஆஸ்திரேலியாவுக்கு எதிரான ஆஷஸ் தொடரில் 0-4 என்ற கணக்கில் படுதோல்வி அடைந்த இங்கிலாந்து அணி இந்த தொடரின் மூலம் வெற்றிப்பாதைக்கு திரும்ப முயற்சிக்கும்.

நியூசிலாந்து அணியில், தொடையில் ஏற்பட்ட காயத்தால் அவதிப்பட்டு வந்த முன்னணி பேட்ஸ்மேன் ராஸ் டெய்லர் உடல்தகுதி பெற்று விட்டார். அவரது வருகை நியூசிலாந்தின் பேட்டிங் வரிசையை வலுப்படுத்தும். சொந்த மண்ணில் நியூசிலாந்து அணி, இங்கிலாந்துடன் இதுவரை 18 டெஸ்ட் தொடர்களில் விளையாடி இருக்கிறது. ஆனால் ஒரே ஒரு தொடரை (1984-ம் ஆண்டு) மட்டுமே நியூசிலாந்து கைப்பற்றி இருக்கிறது. அந்த மோசமான வரலாற்றை மாற்றும் முனைப்புடன் வில்லியம்சன் தலைமையிலான நியூசிலாந்து அணி வியூகங்களை வகுத்துள்ளது. இந்திய நேரப்படி காலை 6.30 மணிக்கு தொடங்கும் இந்த போட்டியை ஸ்டார் ஸ்போர்ட்ஸ் செலக்ட்1 சேனல் நேரடி ஒளிபரப்பு செய்கிறது.