பெண்கள் ஒருநாள் கிரிக்கெட் தரவரிசை: இந்திய வீராங்கனை மந்தனா 4-வது இடத்துக்கு முன்னேற்றம்
சர்வதேச பெண்கள் ஒருநாள் கிரிக்கெட் போட்டியின் அடிப்படையில் வீராங்கனைகளின் தரவரிசைப்பட்டியலை சர்வதேச கிரிக்கெட் கவுன்சில் நேற்று வெளியிட்டது.
புதுடெல்லி,
சர்வதேச பெண்கள் ஒருநாள் கிரிக்கெட் போட்டியின் அடிப்படையில் வீராங்கனைகளின் தரவரிசைப்பட்டியலை சர்வதேச கிரிக்கெட் கவுன்சில் நேற்று வெளியிட்டது. இதன்படி பேட்டிங் தரவரிசையில் இந்திய வீராங்கனை மந்தனா (678 புள்ளிகள்) 10 இடங்கள் முன்னேறி 4-வது இடத்தை பிடித்துள்ளார். 21 வயதான மந்தனாவின் சிறந்த தரவரிசை இதுவாகும். இந்த ஆண்டில் மந்தனா தனது 9 ஆட்டங்களில் 531 ரன்கள் குவித்துள்ளார். ஆஸ்திரேலிய வீராங்கனை எல்செ பெர்ரி (744 புள்ளிகள்) முதலிடத்திலும், நியூசிலாந்து வீராங்கனை சுசி பேட்ஸ் (696 புள்ளிகள்) 2-வது இடத்திலும், ஆஸ்திரேலிய வீராங்கனை மெக் லேனிங் (684 புள்ளிகள்) 3-வது இடத்திலும் உள்ளனர். இந்திய வீராங்கனைகள் மிதாலிராஜ் 7-வது இடமும், ஹர்மன்பிரீத் கவுர் 13-வது இடமும், தீப்தி ஷர்மா 16-வது இடமும் பிடித்துள்ளனர்.
பவுலிங் தரவரிசையில் இந்திய வீராங்கனைகள் ஜூலன் கோஸ்வாமி 5-வது இடத்தையும், பூனம் 13-வது இடத்தையும், தீப்தி ஷர்மா 14-வது இடத்தையும், ஷிகா பாண்டே 17-வது இடத்தையும், ராஜேஸ்வரி கெய்க்வாட் 18-வது இடத்தையும், எக்தா பிஸ்தா 19-வது இடத்தையும் பெற்றுள்ளனர். ஆல்-ரவுண்டர்கள் தரவரிசையில் இந்திய வீராங்கனைகள் தீப்தி ஷர்மா 3-வது இடமும், ஜூலன் கோஸ்வாமி 17-வது இடமும், ஷிகா பாண்டே 18-வது இடமும், ஹர்மன்பிரீத் கவுர் 20-வது இடமும் பிடித்துள்ளனர். தீப்தி ஷர்மா 3-வது இடத்தை பிடிப்பது இதுவே முதல்முறையாகும்.
Related Tags :
Next Story