ஆஸ்திரேலியாவுக்கு எதிரான முதலாவது ஒருநாள் கிரிக்கெட்: இங்கிலாந்து அணி வெற்றி

லண்டன்,

ஆஸ்திரேலிய கிரிக்கெட் அணி, இங்கிலாந்தில் சுற்றுப்பயணம் செய்து 5 ஆட்டங்கள் கொண்ட ஒருநாள் போட்டி தொடரில் விளையாடி வருகிறது. இங்கிலாந்து-ஆஸ்திரேலியா அணிகள் இடையிலான முதலாவது ஒருநாள் கிரிக்கெட் போட்டி லண்டனில் நேற்று முன்தினம் நடந்தது. ‘டாஸ்’ ஜெயித்து முதலில் பேட்டிங் செய்த ஆஸ்திரேலிய அணி, இங்கிலாந்து வீரர்களின் சிறப்பான பந்து வீச்சை தாக்குப்பிடிக்க முடியாமல் 47 ஓவர்களில் 214 ரன்னில் ‘ஆல்-அவுட்’ ஆனது. அதிகபட்சமாக மேக்ஸ்வெல் 62 ரன்னும், ஆஷ்டன் அகர் 40 ரன்னும் எடுத்தனர். இங்கிலாந்து அணி தரப்பில் மொயீன் அலி, பிளங்கெட் தலா 3 விக்கெட்டும், அடில் ரஷித் 2 விக்கெட்டும் வீழ்த்தினார்கள்.

அடுத்து களம் இறங்கிய இங்கிலாந்து அணி 44 ஓவர்களில் 7 விக்கெட் இழப்புக்கு 218 ரன்கள் எடுத்து 3 விக்கெட் வித்தியாசத்தில் வெற்றி பெற்றது. அதிகபட்சமாக கேப்டன் இயான் மோர்கன் 69 ரன்னும், ஜோரூட் 50 ரன்னும், டேவிட் வில்லி ஆட்டம் இழக்காமல் 35 ரன்னும் எடுத்தனர். ஆஸ்திரேலிய அணி தரப்பில் ஸ்டான்லெக், மைக்கேல் நேசெர், ஆண்ட்ரூ டை தலா 2 விக்கெட் கைப்பற்றினார்கள். இங்கிலாந்து வீரர் மொயீன் அலி ஆட்டநாயகன் விருது பெற்றார். இரு அணிகள் இடையிலான 2-வது ஒருநாள் கிரிக்கெட் போட்டி கார்டிப்பில் நாளை நடக்கிறது.