அலைச்சறுக்கு விளையாட்டில் ஈடுபட்ட போது விபத்தில் சிக்கினார், ஹைடன்

குயின்ஸ்லாந்து,

ஆஸ்திரேலிய கிரிக்கெட் அணியின் முன்னாள் தொடக்க ஆட்டக்காரர் மேத்யூ ஹைடன் விடுமுறையை கழிப்பதற்காக தனது குடும்பத்தினருடன் குயின்ஸ்லாந்து நகருக்கு சென்றுள்ளார். அங்குள்ள நார்த் ஸ்டிராட்புரோக் தீவுக்கு சென்ற ஹைடன் கடலில் அலைச்சறுக்கு விளையாட்டில் ஈடுபட்டார். அப்போது எதிர்பாராதவிதமாக அடுக்கடுக்காக வந்த அலையில் சிக்கிக் கொண்ட ஹைடன் விபத்தில் சிக்கி தூக்கி வீசப்பட்டார். அலையில் அடித்து செல்லப்பட்ட அவர் அருகில் உள்ள மணல் திட்டில் தள்ளப்பட்டார். தலை, முகம், கழுத்து மற்றும் முதுகு தண்டில் காயம் அடைந்து நகர முடியாமல் தவித்த ஹைடனை அரு கில் இருந்தவர்கள் மீட்டு ஆஸ்பத்திரிக்கு அனுப்பி வைத்தனர். 46 வயதான ஹைடன் காயத்துடன் ஆஸ்பத்திரியில் சிகிச்சை பெற்று வரும் புகைப்படத்தை தனது இன்ஸ்ட்ராகிராம் பக்கத்தில் பதிவிட்டு இருக்கிறார்.

இது தொடர்பாக அவர் தனது பதிவில், ‘மிகப்பெரிய ஆபத்தில் இருந்து கடவுளின் அருளால் தப்பி இருக்கிறேன். அரை டஜனுக்கு அதிகமான ராட்சத அலைகள் அடுத்தடுத்து வந்ததில் சிக்கி இழுத்து செல்லப்பட்டேன். எலும்பு முறிவுகள் ஏற்பட்டு இருப்பது தெரியவந்துள்ளது. விபத்தில் சிக்கிய எனக்கு உதவியவர்களுக்கும், எனக்காக பிரார்த்தனை செய்தவர்களுக்கும் நன்றி தெரிவித்து கொள்கிறேன். நான் மீண்டும் அலைச்சறுக்கு விளையாட்டுக்கு திரும்புவேன்’ என்று குறிப்பிட்டுள்ளார்.