இலங்கைக்கு எதிரான 20 ஓவர் கிரிக்கெட்டில் நியூசிலாந்து அணி வெற்றி

ஆக்லாந்து,

நியூசிலாந்து-இலங்கை அணிகள் இடையிலான ஒரே ஒரு 20 ஓவர் கிரிக்கெட் போட்டி ஆக்லாந்தில் நேற்று நடந்தது. ‘டாஸ்’ ஜெயித்த இலங்கை அணி பீல்டிங்கை தேர்வு செய்தது. இதன்படி முதலில் பேட்டிங் செய்த நியூசிலாந்து அணி 55 ரன்களுக்குள் 5 விக்கெட்டுகளை இழந்தாலும், ராஸ் டெய்லர் (33 ரன்), பிரேஸ்வெல் (44 ரன்), குஜ்ஜெலிஜின் (ஆட்டம் இழக்காமல் 35 ரன்) ஆகியோரின் சிறப்பான ஆட்டத்தால் 20 ஓவர்களில் 7 விக்கெட் இழப்புக்கு 179 ரன்கள் எடுத்து சவாலான ஸ்கோரை எட்டியது. அடுத்து களம் கண்ட இலங்கை அணி 16.5 ஓவர்களில் 144 ரன்னில் ஆல்-அவுட் ஆனது. இதனால் நியூசிலாந்து அணி 35 ரன்கள் வித்தியாசத்தில் வெற்றி பெற்றது. அதிகபட்சமாக திசரா பெரேரா 43 ரன்கள் எடுத்தார். நியூசிலாந்து அணி தரப்பில் லோக்கி பெர்குசன், சோதி தலா 3 விக்கெட் வீழ்த்தினார்கள். ஏற்கனவே டெஸ்ட் (0-1) மற்றும் ஒருநாள் தொடரை (0-3) இழந்து இருந்த இலங்கை அணி ஒரு வெற்றி கூட பெறாமல் ஏமாற்றத்துடன் திரும்புகிறது.