வெஸ்ட்இண்டீஸ் அணியில் மீண்டும் கெய்ல்

கிரோஸ் இஸ்லெட்,

வெஸ்ட் இண்டீஸ் கிரிக்கெட் அணி சொந்த மண்ணில் இங்கிலாந்துக்கு எதிராக 5 போட்டிகள் கொண்ட ஒரு நாள் தொடரில் விளையாட உள்ளது. முதலாவது ஒரு நாள் போட்டி வருகிற 20-ந்தேதி பிரிட்ஜ்டவுனில் நடக்கிறது. இதில் முதல் 2 ஒரு நாள் போட்டிக்கான வெஸ்ட் இண்டீஸ் அணி நேற்று அறிவிக்கப்பட்டது. அதிரடி வீரர் 39 வயதான கிறிஸ் கெய்ல் அணிக்கு திரும்பியுள்ளார். கடைசியாக கடந்த ஆண்டு ஜூலை மாதம் வங்காளதேசத்திற்கு எதிராக ஆடிய கிறிஸ் கெய்ல், அடுத்து வந்த தொடர்களில் தன்னை தேர்வு செய்ய வேண்டாம் என்று கூறி விட்டு, 20 ஓவர் லீக் போட்டிகளில் கவனம் செலுத்தியது குறிப்பிடத்தக்கது. இதே போல் சொந்த விஷயம் காரணமாக இந்திய பயணத்தை தவிர்த்த மற்றொரு அதிரடி வீரர் இவின் லீவிசும் அணிக்கு தேர்வாகியுள்ளார். ஜாசன் ஹோல்டர் தலைமையிலான இந்த அணியில் டேரன் பிரவோ, ஹெட்மயர், ஷாய் ஹோப் ஆகிய முன்னணி வீரர்களும் இடம் பிடித்துள்ளனர்.