உலக கோப்பை கிரிக்கெட்: வெஸ்ட் இண்டீஸ்-வங்காளதேசம் இன்று மோதல்

டவுன்டான்,

உலக கோப்பை கிரிக்கெட் தொடரில் டவுன்டானில் இன்று (திங்கட்கிழமை) நடக்கும் 23-வது லீக் ஆட்டத்தில் மோர்தசா தலைமையிலான வங்காளதேச அணி, ஜாசன் ஹோல்டர் தலைமையிலான வெஸ்ட் இண்டீஸ் அணியை எதிர்கொள்கிறது. இவ்விரு அணிகளும் ஒரே மாதிரி 4 ஆட்டத்தில் விளையாடி 3 புள்ளியுடன் (ஒரு வெற்றி, 2 தோல்வி, ஒரு முடிவில்லை) உள்ளன. இந்த ஆட்டத்தின் முடிவு அடுத்த சுற்று வாய்ப்பை பிரகாசப்படுத்திக் கொள்வதற்கு முக்கியமானதாகும். எனவே இரு அணி வீரர்களும் சரிவில் இருந்து மீள்வதற்கு கடுமையாக முயற்சிப்பார்கள். கடந்த மாதம் நடந்த முத்தரப்பு கிரிக்கெட் தொடரில் வெஸ்ட் இண்டீஸ் அணியை வங்காளதேசம் தொடர்ச்சியாக மூன்று முறை வீழ்த்தி பிரமாதப்படுத்தியது. இதனால் வங்காளதேச வீரர்கள் கூடுதல் நம்பிக்கையுடன் களம் இறங்குவார்கள். அதே சமயம் வெஸ்ட் இண்டீஸ் அணி உலக கோப்பை கிரிக்கெட்டில் வங்காளதேசத்துடன் ஒரு போதும் (3 வெற்றி, ஒரு முடிவில்லை) தோற்றதில்லை. அந்த பெருமையை தக்க வைக்க போராடும்.

இந்திய நேரப்படி பிற்பகல் 3 மணிக்கு தொடங்கும் இந்த ஆட்டத்தை ஸ்டார் ஸ்போர்ட்ஸ் சேனல் நேரடி ஒளிபரப்பு செய்கிறது.