சச்சின், லாரா சாதனையை முறியடிக்க காத்திருக்கும் விராட் கோலி..!

சவுதாம்ப்டன், 

இந்திய அணியின் கேப்டன் விராட் கோலி, தனது அசாத்திய பேட்டிங் திறனால் பல சாதனைகளை நிகழ்த்தி வருகிறார். நடப்பு உலக கோப்பை தொடரில் இன்னும் சதம் அடிக்காத விராட் கோலி, ஆப்கானிஸ்தான் அணிக்கு எதிராக சதத்தை எட்டுவார் என்று அவரது ரசிகர்கள் எதிர்பார்க்கின்றனர். 

இந்த நிலையில், கிரிக்கெட் ஜாம்பவான்களான சச்சின் டெண்டுல்கர், பிரைன் லாரா ஆகியோரின் சாதனையை விராட் கோலி முறியடிக்க அவருக்கு 104 ரன்களே தேவைப்படுகின்றன. சர்வதேச போட்டிகளில் 20 ஆயிரம் ரன்களை குறைந்த இன்னிங்ஸ்களில் (453 இன்னிங்ஸ்) எட்டிய சாதனையை சச்சின், மற்றும் லாரா ஆகியோர் கூட்டாக வைத்துள்ளனர்.  தற்போது வரை 131 டெஸ்ட், 222 ஒருநாள் போட்டிகள், 62 இருபது ஓவர் போட்டிகள் என 415 இன்னிங்ஸ்களில் விளையாடியுள்ள விராட் கோலி 19,896 ரன்களை குவித்துள்ளார். 

இன்னும் 104 ரன்கள் அடித்தால் குறைந்த இன்னிங்ஸ்களில் 20 ஆயிரம் ரன்களை எட்டிய வீரர் என்ற வியத்தகு சாதனையை விராட் கோலி படைக்க உள்ளார்.