கிரிக்கெட்

டெஸ்ட் கிரிக்கெட் தரவரிசையில் இந்திய வீரர்கள் பும்ரா, ரஹானே முன்னேற்றம் + "||" + In the Test Rankings Bumrah progresses into the top 10 ICC Release

டெஸ்ட் கிரிக்கெட் தரவரிசையில் இந்திய வீரர்கள் பும்ரா, ரஹானே முன்னேற்றம்

டெஸ்ட் கிரிக்கெட் தரவரிசையில் இந்திய வீரர்கள் பும்ரா, ரஹானே முன்னேற்றம்
டெஸ்ட் கிரிக்கெட் தரவரிசையில் இந்திய வீரர்கள் பும்ரா, ரஹானே வெகுவாக முன்னேற்றம் கண்டுள்ளனர்.
துபாய்,

சர்வதேச கிரிக்கெட் கவுன்சில் (ஐ.சி.சி.) டெஸ்ட் கிரிக்கெட் வீரர்களின் புதிய தரவரிசை பட்டியலை நேற்று வெளியிட்டது.

இதில் பேட்ஸ்மேன்களின் தரவரிசையில் டாப்-5 இடங்களில் மாற்றம் இல்லை. இந்திய கேப்டன் விராட் கோலி (910 புள்ளி) முதலிடத்திலும், ஆஸ்திரேலிய முன்னாள் கேப்டன் ஸ்டீவன் சுமித் 2-வது இடத்திலும் (904 புள்ளி), நியூசிலாந்து கேப்டன் வில்லியம்சன் 3-வது இடத்திலும் (878), இந்தியாவின் புஜாரா 4-வது இடத்திலும் (856), நியூசிலாந்தின் ஹென்றி நிகோல்ஸ் (749 புள்ளி) 5-வது இடத்திலும் தொடருகிறார்கள். இலங்கை கேப்டன் கருணாரத்னே 2 இடம் முன்னேறி 6-வது இடத்துக்கும், இங்கிலாந்து கேப்டன் ஜோ ரூட் 2 இடம் உயர்ந்து 7-வது இடத்துக்கும் வந்துள்ளனர்.


வெஸ்ட் இண்டீசுக்கு எதிரான டெஸ்டில் 81, 102 ரன்கள் வீதம் எடுத்து ஆட்டநாயகன் விருது பெற்ற இந்திய துணை கேப்டன் ரஹானே கிடுகிடுவென 10 இடங்கள் ஏற்றம் கண்டு 11-வது இடத்தை ஆக்கிரமித்துள்ளார்.

ஆஸ்திரேலியாவுக்கு எதிரான பரபரப்பான ஆஷஸ் 3-வது டெஸ்டில் 135 ரன்கள் விளாசி இங்கிலாந்து அணிக்கு ஒரு விக்கெட் வித்தியாசத்தில் வெற்றியை தேடித்தந்த இங்கிலாந்து ஆல்-ரவுண்டர் பென் ஸ்டோக்ஸ் 13 இடங்கள் உயர்ந்து 693 புள்ளிகளுடன் 13-வது இடத்தை பிடித்துள்ளார்.

பந்து வீச்சாளர்களின் தரவரிசையில் முதல் 3 இடங்களில் முறையே ஆஸ்திரேலியாவின் பேட் கம்மின்ஸ் (908 புள்ளி), தென்ஆப்பிரிக்காவின் காஜிசோ ரபடா (851), இங்கிலாந்தின் ஜேம்ஸ் ஆண்டர்சன் (814) நீடிக்கிறார்கள்.

ஆன்டிகுவாவில் நடந்த வெஸ்ட் இண்டீசுக்கு எதிரான முதலாவது டெஸ்டின் 2-வது இன்னிங்சில் 7 ரன் மட்டுமே விட்டுக்கொடுத்து 5 விக்கெட்டுகளை சாய்த்து மிரட்டிய இந்திய வேகப்பந்து வீச்சாளர் ஜஸ்பிரித் பும்ரா தரவரிசையில் முதல் முறையாக டாப்-10 இடத்திற்குள் நுழைந்துள்ளார். 9 இடங்கள் எகிறிய பும்ரா 774 புள்ளிகளுடன் 7-வது இடம் வகிக்கிறார். மற்றொரு இந்திய பவுலர் இஷாந்த் ஷர்மா 671 புள்ளிகளுடன் 21-வது இடத்தில் உள்ளார். இதே டெஸ்டில் ஜொலிக்க தவறிய இந்திய சுழற்பந்து வீச்சாளர் ரவீந்திர ஜடேஜா சறுக்கியுள்ளார். அவர் 5 இடங்கள் இறங்கி 10-வது இடத்துக்கு தள்ளப்பட்டார். ஆஷஸ் 3-வது டெஸ்டில் மொத்தம் 8 விக்கெட்டுகளை சாய்த்த இங்கிலாந்து வேகப்பந்து வீச்சாளர் ஜோப்ரா ஆர்ச்சர் 40 இடங்கள் முன்னேறி 43-வது இடத்தை பெற்றுள்ளார்.

டெஸ்ட் ஆல்-ரவுண்டர்களின் தரவரிசையில் இங்கிலாந்தின் பென் ஸ்டோக்ஸ் 4-ல் இருந்து 2-வது இடத்தை (411 புள்ளி) எட்டியுள்ளார். ‘நம்பர் ஒன்’ ஆல்-ரவுண்டராக வெஸ்ட் இண்டீஸ் கேப்டன் ஜாசன் ஹோல்டர் (433 புள்ளி) வலம் வருகிறார்.