கேப்டனாக சில சாதனைகளை நோக்கி விராட் கோலி

இந்திய அணி, வெஸ்ட் இண்டீசுக்கு சுற்றுப்பயணம் மேற்கொண்டு விளையாடி வருகிறது. 20 ஓவர் மற்றும் ஒருநாள் போட்டிகளைத் தொடர்ந்து,  தற்போது டெஸ்ட் போட்டிகள் நடைபெற்று வருகின்றன.

ஆன்டிகுவாவில் நடந்த முதலாவது டெஸ்ட் போட்டியில் இந்திய அணி 318 ரன்கள் வித்தியாசத்தில் அபார வெற்றி பெற்றது. இதனை தொடர்ந்து, இரு அணிகளுக்கும் இடையிலான 2-வது மற்றும் கடைசி டெஸ்ட் போட்டி ஜமைக்காவில் உள்ள கிங்ஸ்டனில்  நடைபெற்று வருகிறது. 

இதில் டாஸ் வென்ற வெஸ்ட் இண்டீஸ் அணி பந்து வீச்சை தேர்வு செய்தது. இதனையடுத்து இந்திய அணி முதலில் களமிறங்கி பேட்டிங் செய்து வருகிறது.

விராட் கோலி பேட்ஸ்மேனாக பல்வேறு சாதனைகள் செய்திருந்தாலும்,  கேப்டனாகவும் சில சாதனைகளை படைத்து வருகிறார். இந்நிலையில் 2-வது டெஸ்ட் போட்டியில், விராட் கோலி முறியடிக்க வாய்ப்புகள் உள்ள சில சாதனைகள்... 

வெஸ்ட் இண்டீஸ் அணிக்கு எதிரான 2-வது டெஸ்ட் போட்டியில் விராட் கோலி சதமடித்தால், அது விராட் கோலி கேப்டனாக  அடிக்கும் 19-வது சதமாகும்.  கேப்டனாக அதிக சதமடித்தவர்கள் பட்டியலில், 19 சதங்களுடன் ஆஸ்திரேலிய வீரர் ரிக்கி பாண்டிங் 2-ம் இடத்தில் உள்ளார். எனவே இந்த டெஸ்ட் போட்டியில் சதம் அடிப்பதன் மூலம் பாண்டிங் சாதனையை விராட் கோலி சமன் செய்வார். தென்னாப்பிரிக்க வீரர் கிரீம் ஸ்மித் 25 சதங்களுடன் இந்தப் பட்டியலில் முதலிடத்தில் இருக்கிறார்.

இது மட்டுமல்லாது இந்தப் போட்டியில் வெற்றி பெறுவதன் மூலம், இந்திய அணியின் முன்னாள் கேப்டன் டோனியின் சாதனையை முறியடிக்க முடியும். அதாவது, டோனி தலைமையிலான இந்திய அணி 60 டெஸ்ட் போட்டிகளில்  27 வெற்றிகளை பெற்றுள்ளது. கோலி தலைமையிலான இந்திய அணி தற்போது வரை 47 போட்டிகளில், 27 வெற்றிகளைப் பெற்றுள்ளது. எனவே இந்தப் போட்டியில் வெற்றிபெறுவதன் மூலம் டோனியின் சாதனையை முறியடித்து  அதிக டெஸ்ட் வெற்றிகளைப் பெற்ற இந்திய கேப்டன் என்ற பட்டியலில் கோலி முதலிடம் பெறுவார்.