டெஸ்ட் தரவரிசையில் முதலிடத்தை இழந்தார் விராட் கோலி


டெஸ்ட் தரவரிசையில் முதலிடத்தை இழந்தார் விராட் கோலி
x
தினத்தந்தி 3 Sep 2019 9:53 AM GMT (Updated: 3 Sep 2019 11:18 PM GMT)

டெஸ்ட் போட்டிகளில் பேட்ஸ்மேன்களுக்கான தரவரிசையில் விராட் கோலி முதலிடத்தை பறிகொடுத்துள்ளார்.


சர்வதேச கிரிக்கெட் கவுன்சில் (ஐ.சி.சி.), டெஸ்ட் கிரிக்கெட் வீரர்களின் புதிய தரவரிசை பட்டியலை நேற்று வெளியிட்டது. இதில் பேட்ஸ்மேன்களின் தரவரிசையில் இந்திய கேப்டன் விராட் கோலி முதலிடத்தை இழந்து, 2-வது இடத்துக்கு தள்ளப்பட்டுள்ளார்.

வெஸ்ட் இண்டீசுக்கு எதிரான 2-வது டெஸ்டின் முதலாவது இன்னிங்சில் கோலி அரைசதம் அடித்த போதிலும் (76 ரன்) 2-வது இன்னிங்சில் முதல் பந்திலேயே ‘டக்-அவுட்’ ஆகிப் போனார். ஒவ்வொரு மோசமான ஆட்டமும் வீரர்களின் தரவரிசையில் எதிரொலிக்கும். அந்த வகையில் 7 புள்ளிகளை இழந்த கோலி 903 புள்ளிகளுடன் 2-வது இடத்துக்கு இறங்கியுள்ளார். ஆஸ்திரேலிய முன்னாள் கேப்டன் ஸ்டீவன் சுமித் (904 புள்ளி) மீண்டும் ‘நம்பர் ஒன்’ அரியணையில் ஏறியுள்ளார்.

வெஸ்ட் இண்டீசுக்கு எதிரான 2-வது டெஸ்டில் 24 மற்றும் 64 ரன் வீதம் எடுத்த இந்திய துணை கேப்டன் ரஹானே 4 இடங்கள் உயர்ந்து 7-வது இடத்தை பிடித்துள்ளார். 2 ஆண்டுகளுக்கு பிறகு ரஹானே டாப்-10 இடத்துக்குள் அடியெடுத்து வைத்துள்ளார். இதே டெஸ்டில் சதம் விளாசிய இந்திய வீரர் ஹனுமா விஹாரி 40 இடங்கள் ஏற்றம் கண்டு 30-வது இடத்தை பிடித்துள்ளார்.

Next Story