விஜய் ஹசாரே கோப்பை கிரிக்கெட்: தமிழக அணி 5-வது வெற்றி முரளி விஜய் சதம் அடித்தார்

ஜெய்ப்பூர், 

விஜய் ஹசாரே கோப்பைக்கான உள்நாட்டு ஒரு நாள் கிரிக்கெட் போட்டித் தொடர் பல்வேறு நகரங்களில் நடந்து வருகிறது. இதில் பங்கேற்றுள்ள 38 அணிகள் 4 பிரிவாக பிரிக்கப்பட்டு லீக்கில் மோதுகின்றன.

‘சி’ பிரிவில் அங்கம் வகிக்கும் தமிழக அணி நேற்று தனது 5-வது லீக்கில் ஜம்மு-காஷ்மீர் அணியை ஜெய்ப்பூரில் எதிர்கொண்டது. முதலில் பேட் செய்த ஜம்மு-காஷ்மீர் அணி 9 விக்கெட்டுக்கு 238 ரன்கள் எடுத்தது. கம்ரன் இக்பால் (67 ரன்), ஷூபம் பன்டிர் (66 ரன்), அப்துல் சமாத் (50 ரன்) அரைசதம் அடித்தனர். அடுத்து களம் இறங்கிய தமிழக அணி 48 ஓவர்களில் 2 விக்கெட்டுக்கு 239 ரன்கள் சேர்த்து 8 விக்கெட் வித்தியாசத்தில் வெற்றி பெற்றது. முரளிவிஜய் 117 ரன்களும் (131 பந்து, 14 பவுண்டரி), பாபா அபராஜித் 86 ரன்களும் (நாட்-அவுட்) விளாசினர். தோல்வி பக்கமே செல்லாத தமிழக அணி தொடர்ச்சியாக 5-வது வெற்றியை சுவைத்து, கால் இறுதி வாய்ப்பை பிரகாசப்படுத்திக் கொண்டுள்ளது.