ரோகித் சர்மாவின் சதத்தால் சரிவில் இருந்து மீண்டது இந்தியா

ராஞ்சி,

இந்தியா - தென்ஆப்பிரிக்கா கிரிக்கெட் அணிகள் இடையிலான 3-வது மற்றும் கடைசி டெஸ்ட கிரிக்கெட் போட்டி ஜார்கண்ட் மாநிலம் ராஞ்சியில் நேற்று தொடங்கியது. இந்திய அணியில் ஒரு மாற்றமாக இஷாந்த் ஷர்மாவுக்கு பதிலாக கடைசி நேரத்தில் அணியில் சேர்க்கப்பட்ட ஜார்கண்டை சேர்ந்த 30 வயதான இடக்கை சுழற்பந்து வீச்சாளர் ஷபாஸ் நதீம், சர்வதேச அரங்கில் புதுமுக வீரராக இடம் பிடித்தார்.

தென்ஆப்பிரிக்க அணியில் 5 மாற்றமாக காயமடைந்த மார்க்ராம், கேஷவ் மகராஜ் மற்றும் செனுரன் முத்துசாமி, வெரோன் பிலாண்டர், டி புருன் ஆகியோர் கழற்றி விடப்பட்டு அவர்களுக்கு பதிலாக ஜூபைர் ஹம்சா, டேன் பீட், நிகிடி, விக்கெட் கீப்பர் ஹென்ரிச் கிளாசென், இடக்கை சுழற்பந்து வீச்சாளர் ஜார்ஜ் லின்டே ஆகியோர் சேர்க்கப்பட்டனர். இதில் கிளாசென், ஜார்ஜ் லின்டே ஆகியோருக்கு இது அறிமுக டெஸ்ட் போட்டியாகும்.

தொடர்ந்து 3-வது முறையாக ‘டாஸ்’ ஜெயித்த இந்திய கேப்டன் விராட் கோலி தயக்கமின்றி முதலில் பேட்டிங் செய்வதாக அறிவித்தார். இதன்படி ரோகித் சர்மாவும், மயங்க் அகர்வாலும் இந்தியாவின் தொடக்க ஆட்டக்காரர்களாக அடியெடுத்து வைத்தனர்.

பொதுவாக இந்திய ஆடுகளங்களில் முதல் ஒரு மணி நேரம் பந்து வீச்சு எடுபடும். அந்த பகுதியில் மட்டும் பேட்ஸ்மேன்கள் மிகுந்த எச்சரிக்கையுடன் ஆட வேண்டியது முக்கியமாகும். இந்த டெஸ்டிலும் ஆரம்பத்தில் தென்ஆப்பிரிக்க வேகப்பந்து வீச்சாளர்கள் மிரட்டினர். குறிப்பாக காஜிசோ ரபடா, துல்லியமான தாக்குதலோடு ‘ஸ்விங்’ செய்து திணறடித்தார். அவரது பந்து வீச்சில் மயங்க் அகர்வால் (10 ரன்) ஸ்லிப்பில் நின்ற டீன் எல்கரிடம் பிடிபட்டார். அடுத்து வந்த புஜாரா (0) அவரது பந்து வீச்சில் எல்.பி.டபிள்யூ. ஆனார். முதலில் நடுவர் ரிச்சர்ட் இல்லிங்வொர்த் விரலை உயர்த்தவில்லை. பிறகு தென்ஆப்பிரிக்க வீரர்கள் டி.ஆர்.எஸ். முறைப்படி அப்பீல் செய்த போது பந்து ஸ்டம்பை தாக்குவது உறுதியானதால், புஜாரா வெளியேற்றப்பட்டார். உள்நாட்டில் புஜாரா டக்-அவுட் ஆவது இது 2-வது முறையாகும்.

இதன் பின்னர் கேப்டன் விராட் கோலி வந்தார். ரோகித் சர்மா 7 ரன்னில் இருந்த போது ரபடாவின் பந்து வீச்சில் எல்.பி.டபிள்யூ. ஆனதாக நடுவர் தீர்ப்பளித்தார். உடனடியாக ரோகித் சர்மா அப்பீல் செய்தார். டி.வி. ரீப்ளேயில் பந்து பேட்டில் உரசிக்கொண்டு அதன் பிறகே காலுறையில் படுவது தெரிந்ததால் ரோகித் சர்மா தப்பித்தார்.

முந்தைய டெஸ்டில் இரட்டை சதம் அடித்த இந்திய கேப்டன் விராட் கோலி (12 ரன், 22 பந்து, 2 பவுண்டரி) இந்த முறை நிலைக்கவில்லை. வேகப்பந்து வீச்சாளர் நார்ஜே முதல் 2 பந்துகளை ஆப்-ஸ்டம்புக்கு வெளியே வீசி விட்டு 3-வது பந்தை ஸ்டம்புக்குள் போட்டார். தடுமாற்றத்திற்கு உள்ளான கோலி எல்.பி.டபிள்யூ.-வில் சிக்கினார். இதனால் கோலி டி.ஆர்.எஸ். கேட்டார். ரீப்ளேயில் பந்து லெக்ஸ்டம்பை லேசாக தட்டுவது தெரிந்தது. இதையடுத்து, ‘நடுவர் முடிவு’ என்ற அடிப்படையில் கோலி ஏமாற்றத்துடன் நடையை கட்டினார்.

அப்போது இந்திய அணி 39 ரன்னுக்குள் 3 விக்கெட்டுகளை தாரைவார்த்து தத்தளித்தது. இந்த நெருக்கடியான கட்டத்தில் ரோகித் சர்மாவுடன், துணை கேப்டன் அஜிங்யா ரஹானே கைகோர்த்தார். இருவரும் படிப்படியாக அணியை சரிவில் இருந்து மீட்டெடுத்தனர். மதிய உணவு இடைவேளையின் போது இந்தியா 3 விக்கெட்டுக்கு 71 ரன்கள் எடுத்திருந்தது.

ரோகித் சர்மாவும், ரஹானேவும் தங்களை நிலை நிறுத்திக்கொண்ட பிறகு எத்தகைய பந்து வீச்சையும் அடித்து நொறுக்கினர். முதலில் அச்சுறுத்திய ரபடாவின் ஒரே ஓவரில் ரஹானே 3 பவுண்டரிகளை சாத்தினார். அவரது இன்னொரு ஓவரில் இருவரும் சேர்ந்து 3 பவுண்டரிகள் ஓட விட்டனர். இதே போல் ஜார்ஜ் லின்டே, டேன் பீட் ஆகியோரின் சுழற்பந்து வீச்சையும் துவம்சம் செய்தனர்.