டெஸ்டில் அதிவேகமாக 7 ஆயிரம் ரன்: 73 ஆண்டு கால சாதனையை முறியடித்தார், சுமித்

அடிலெய்டு,

இந்த போட்டியில் ஆஸ்திரேலிய வீரர் ஸ்டீவன் சுமித் 23 ரன்கள் எடுத்த போது டெஸ்டில் 7 ஆயிரம் ரன்களை கடந்தார். இதன் மூலம் இந்த இலக்கை வேகமாக எட்டிய வீரர் என்ற மகத்தான சாதனையை தன்வசப்படுத்தினார். 70-வது டெஸ்டில் ஆடும் சுமித் அதில் பேட்டிங் செய்த 126-வது இன்னிங்சில் இச்சாதனையை படைத்திருக்கிறார்.

இதற்கு முன்பு இங்கிலாந்தின் வாலி ஹேமன்ட் தனது 131-வது இன்னிங்சில் இந்த மைல்கல்லை அடைந்ததே சாதனையாக இருந்தது. அவர் 1946-ம் ஆண்டில் இச்சிறப்பை பெற்றிருந்தார். அவரது 73 ஆண்டு கால சாதனையை சுமித் இப்போது முறியடித்துள்ளார். இந்த சாதனை பட்டியலில் 3-வது இடத்தில் இந்தியாவின் ஷேவாக்கும் (134 இன்னிங்ஸ்), 4-வது இடத்தில் சச்சின் தெண்டுல்கரும் (136 இன்னிங்ஸ்), 5-வது இடத்தில் விராட் கோலியும் (138 இன்னிங்ஸ்) உள்ளனர்.

30 வயதான சுமித் டெஸ்ட் கிரிக்கெட்டில் இதுவரை 26 சதம், 27 அரைசதம் உள்பட 7,013 ரன்கள் (சராசரி 63.75) சேர்த்துள்ளார். ஒட்டுமொத்தத்தில் 7 ஆயிரம் ரன்களை கடந்த 50-வது வீரர் ஆவார். இவர்களில் 60 ரன்களுக்கு மேல் சராசரி கொண்ட ஒரே வீரர் சுமித் மட்டும் தான். டான் பிராட்மேனின் ஒட்டுமொத்த ஸ்கோரையும் (6,996 ரன்) சுமித் தாண்டியது குறிப்பிடத்தக்க அம்சமாகும்.