நியூசிலாந்துக்கு எதிரான 20 ஓவர் கிரிக்கெட்: இந்திய அணியில் சஞ்சு சாம்சன் நீக்கம்

மும்பை,

இந்திய கிரிக்கெட் அணி விரைவில் நியூசிலாந்தில் சுற்றுப்பயணம் மேற்கொண்டு ஐந்து 20 ஓவர் போட்டி, மூன்று ஒரு நாள் மற்றும் இரண்டு டெஸ்டுகளில் விளையாட உள்ளது. இந்தியா-நியூசிலாந்து இடையிலான முதலாவது 20 ஓவர் போட்டி வருகிற 24-ந்தேதி ஆக்லாந்தில் நடக்கிறது.

நியூசிலாந்துக்கு எதிரான 20 ஓவர் தொடரில் ஆடும் இந்திய அணி நேற்றிரவு அறிவிக்கப்பட்டது. இலங்கைக்கு எதிரான 20 ஓவர் தொடரில் கடைசி ஆட்டத்தில் களம் இறங்கி 6 ரன் எடுத்த விக்கெட் கீப்பர் கேரளாவைச் சேர்ந்த சஞ்சு சாம்சன் கழற்றி விடப்பட்டார். இலங்கை போட்டிகளுக்கு ஓய்வு அளிக்கப்பட்டிருந்த ரோகித் சர்மா, முகமது ஷமி அணிக்கு திரும்புகிறார்கள். ஆல்-ரவுண்டர் ஹர்திக் பாண்ட்யா காயத்தில் இருந்து முழுமையாக மீளாததால் அவரது பெயர் பரிசீலிக்கப்படவில்லை.

இந்திய 20 ஓவர் அணி வருமாறு:-

விராட் கோலி (கேப்டன்), ரோகித் சர்மா (துணை கேப்டன்), லோகேஷ் ராகுல், ஷிகர் தவான், ஸ்ரேயாஸ் அய்யர், ரிஷாப் பண்ட், குல்தீப் யாதவ், யுஸ்வேந்திர சாஹல், மனிஷ் பாண்டே, ஷிவம் துபே, ஜஸ்பிரித் பும்ரா, ஷர்துல் தாகூர், நவ்தீப் சைனி, வாஷிங்டன் சுந்தர், ரவீந்திர ஜடேஜா, முகமது ஷமி.

நியூசிலாந்துக்கு எதிரான ஒரு நாள் மற்றும் டெஸ்ட் தொடருக்கான இந்திய அணி தேர்வு தள்ளி வைக்கப்பட்டுள்ளது.