பெண்கள் முத்தரப்பு 20 ஓவர் கிரிக்கெட்: இந்திய அணி மீண்டும் தோல்வி

மெல்போர்ன்,

ஆஸ்திரேலியா, இந்தியா, இங்கிலாந்து ஆகிய பெண்கள் அணிகள் இடையிலான 20 ஓவர் கிரிக்கெட் போட்டி தொடர் ஆஸ்திரேலியாவில் நடந்து வருகிறது. இதில் ஒவ்வொரு அணியும், மற்ற அணியுடன் தலா 2 முறை மோத வேண்டும். லீக் முடிவில் முதல் 2 இடங்களை பிடிக்கும் அணிகள் இறுதிப்போட்டிக்கு முன்னேறும். இதில் மெல்போர்னில் நேற்று நடந்த 4-வது லீக் ஆட்டத்தில் இந்தியா-இங்கிலாந்து அணிகள் மோதின.

‘டாஸ்’ ஜெயித்த இங்கிலாந்து அணி கேப்டன் ஹீதர் நைட் பீல்டிங்கை தேர்வு செய்தார். இதன்படி முதலில் பேட்டிங் செய்த இந்திய அணி 20 ஓவர்களில் 6 விக்கெட் இழப்புக்கு 123 ரன்கள் எடுத்தது. அதிகபட்சமாக மந்தனா 45 ரன்கள் (40 பந்துகளில் 7 பவுண்டரி, ஒரு சிக்சருடன்) எடுத்தார். மற்ற வீராங்கனைகள் சொற்ப ரன்னில் ஆட்டம் இழந்தனர். இங்கிலாந்து அணி தரப்பில் அன்யா ஸ்ருப்சோல் 3 விக்கெட்டும், கேத்தரின் புருன்ட் 2 விக்கெட்டும் வீழ்த்தினர்.

அடுத்து களம் இறங்கிய இங்கிலாந்து அணி 18.5 ஓவர்களில் 6 விக்கெட் இழப்புக்கு 124 ரன்கள் சேர்த்து 4 விக்கெட் வித்தியாசத்தில் வெற்றி பெற்றது. நதாலி சிவெர் அரைசதம் (50 ரன், 38 பந்து, 6 பவுண்டரி, ஒரு சிக்சர்) விளாசினார். இந்திய அணி தரப்பில் ராஜேஸ்வரி கெய்க்வாட் 3 விக்கெட்டும், ராதா யாதவ் ஒரு விக்கெட்டும் கைப்பற்றினார்கள். இங்கிலாந்து வேகப்பந்து வீச்சாளர் அன்யா ஸ்ருப்சோல் ஆட்டநாயகி விருது பெற்றார். முந்தைய லீக் ஆட்டத்தில் 4 விக்கெட் வித்தியாசத்தில் ஆஸ்திரேலியாவிடம் தோல்வி கண்டு இருந்த இந்திய அணி தொடர்ச்சியாக சந்தித்த 2-வது தோல்வி இதுவாகும்.

மெல்போர்னில் இன்று (சனிக்கிழமை) நடைபெறும் 5-வது லீக் ஆட்டத்தில் இந்திய அணி, ஆஸ்திரேலியாவை எதிர்கொள்கிறது. இந்திய நேரப்படி காலை 6.40 மணிக்கு தொடங்கும் இந்த போட்டியை சோனி டென் 3 சேனல் நேரடியாக ஒளிபரப்பு செய்கிறது. இன்றைய போட்டி இந்திய அணிக்கு வாழ்வா? சாவா? போராட்டமாகும். இதில் தோல்வி அடைந்தால் இந்திய அணி இறுதிப்போட்டி வாய்ப்பை இழந்து விடும்.