நியூசிலாந்து கிரிக்கெட் அணியின் வங்காளதேச டெஸ்ட் தொடர் தள்ளிவைப்பு

டாக்கா, 

நியூசிலாந்து கிரிக்கெட் அணி வருகிற ஆகஸ்டு மற்றும் செப்டம்பர் மாதத்தில் வங்காளதேசத்தில் சுற்றுப்பயணம் செய்து 2 ஆட்டங்கள் கொண்ட டெஸ்ட் தொடரில் விளையாட திட்டமிட்டு இருந்தது. நியூசிலாந்தில் கொரோனா வைரசின் தாக்கம் கட்டுக்குள் வந்து விட்டது. ஆனால் வங்காளதேசத்தில் கொரோனா பாதிப்பு இன்னும் குறைந்தபாடில்லை. 

சமீபத்தில் வங்காளதேச கிரிக்கெட் அணியின் முன்னாள் கேப்டன் மோர்தசா உள்பட 3 வீரர்கள் கொரோனா தொற்றுக்கு ஆளானார்கள். இந்த மாதிரியான சூழ்நிலையில் நியூசிலாந்து அணிக்கு எதிரான டெஸ்ட் தொடரை நடத்தினால் பாதுகாப்பானதாக இருக்காது என்பதை உணர்ந்துள்ள வங்காளதேச கிரிக்கெட் வாரியம், நியூசிலாந்து கிரிக்கெட் வாரியத்தின் சம்மதத்துடன் இந்த போட்டி தொடரை காலவரையின்றி தள்ளிவைப்பதாக அறிவித்துள்ளது.