டோனியின் சாதனையை முறியடித்தார், கோலி

*விராட் கோலி தலைமையில் இந்திய அணி உள்நாட்டில் பெற்ற 22-வது டெஸ்ட் (29 டெஸ்டில்) வெற்றி இதுவாகும். இதன் மூலம் சொந்த மண்ணில் அதிக வெற்றிகளை பெற்றுத்தந்த இந்திய கேப்டன் என்ற பெருமையை டோனியிடம் (30 டெஸ்டில் 21 வெற்றி) இருந்து கோலி தட்டிப்பறித்தார்.

* டெஸ்டில் இந்திய அணி 10 விக்கெட் வித்தியாசத்தில் வெற்றி பெறுவது இது 9-வது நிகழ்வாகும். இங்கிலாந்துக்கு எதிராக ஏற்கனவே ஒரு முறை விக்கெட் இழப்பின்றி வெற்றி பெற்றிருக்கிறது.

* இந்த டெஸ்டில் சுழற்பந்து வீச்சாளர்கள் மட்டும் மொத்தம் 27 விக்கெட்டுகளை கைப்பற்றினர். இதன் மூலம் சுழற்பந்து வீச்சாளர்கள் அதிக விக்கெட் வேட்டையாடிய பகல்-இரவு டெஸ்ட்டாக இது அமைந்துள்ளது. இதற்கு முன்பு 2017-18-ம் ஆண்டு துபாயில் நடந்த இலங்கை-பாகிஸ்தான் பகல்-இரவு டெஸ்டில் 24 விக்கெட்டுகளை சுழற்பந்து வீச்சாளர்கள் வீழ்த்தியதே சாதனையாக இருந்தது.

* 2-வது இன்னிங்சில் இங்கிலாந்து வீரர் பென் ஸ்டோக்சின் விக்கெட்டை இந்திய சுழற்பந்து வீச்சாளர் அஸ்வின் வீழ்த்தினார். அவரது சுழலில் ஸ்டோக்ஸ் சிக்குவது 11-வது முறையாகும். அஸ்வின் பந்து வீச்சில் அதிக முறை ஆட்டமிழந்த வீரராக ஸ்டோக்ஸ் இருக்கிறார்.