இலங்கைக்கு எதிரான 20 ஓவர் கிரிக்கெட்: வெஸ்ட் இண்டீஸ் அணியில் மீண்டும் கெய்ல்


இலங்கைக்கு எதிரான 20 ஓவர் கிரிக்கெட்: வெஸ்ட் இண்டீஸ் அணியில் மீண்டும் கெய்ல்
x
தினத்தந்தி 28 Feb 2021 12:44 AM GMT (Updated: 28 Feb 2021 12:44 AM GMT)

இலங்கைக்கு எதிரான 20 ஓவர் கிரிக்கெட் போட்டியில் வெஸ்ட் இண்டீஸ் அணியில் மீண்டும் மூத்த அதிரடி பேட்ஸ்மேன் கிறிஸ் கெய்ல் இடம்பெற்றுள்ளார்.

கிங்ஸ்டன், 

இலங்கை கிரிக்கெட் அணி வெஸ்ட் இண்டீசில் சுற்றுப்பயணம் மேற்கொண்டு மூன்று 20 ஓவர், 3 ஒரு நாள் மற்றும் 2 டெஸ்டுகளில் விளையாடுகிறது. இலங்கை - வெஸ்ட் இண்டீஸ் இடையிலான முதலாவது 20 ஓவர் போட்டி வருகிற 3-ந்தேதி ஆன்டிகுவாவில் நடக்கிறது. 

இலங்கைக்கு எதிரான 20 ஓவர் தொடருக்கான வெஸ்ட் இண்டீஸ் அணி நேற்று அறிவிக்கப்பட்டது. கேப்டனாக பொல்லார்ட் நீடிக்கிறார். மூத்த அதிரடி பேட்ஸ்மேன் 41 வயதான கிறிஸ் கெய்ல் 2 ஆண்டுக்கு பிறகு அணிக்கு திரும்பியுள்ளார். இந்த ஆண்டு கடைசியில் 20 ஓவர் உலக கோப்பை கிரிக்கெட் போட்டி இந்தியாவில் நடக்கிறது. 

இதை மனதில் கொண்டு கெய்ல் அழைக்கப்பட்டுள்ளார். இதே போல் வேகப்பந்து வீச்சாளர் பிடெல் எட்வர்ட்ஸ் அணிக்கு தேர்வாகியிருக்கிறார். கடைசியாக 2012-ம் ஆண்டு வெஸ்ட் இண்டீஸ் அணிக்காக ஆடிய 39 வயதான எட்வர்ட்ஸ் 9 ஆண்டுக்கு பிறகு வாய்ப்பு பெற்றுள்ளார். 

இந்த மாத தொடக்கத்தில் கொரோனா தொற்று பாதிப்புக்குள்ளான ஆல்-ரவுண்டர் ஆந்த்ரே ரஸ்செல், அதன் தாக்கத்தில் இருந்து இன்னும் முழுமையாக மீளாததால் அவரது பெயர் பரிசீலிக்கப்படவில்லை.

Next Story