சர்வதேச கிரிக்கெட்டில் படைக்க விரும்பும் சாதனை எது? வாஷிங்டன் சுந்தர் ருசிகர பதில்


சர்வதேச கிரிக்கெட்டில் படைக்க விரும்பும் சாதனை எது? வாஷிங்டன் சுந்தர் ருசிகர பதில்
x
தினத்தந்தி 21 May 2021 10:04 PM GMT (Updated: 21 May 2021 10:04 PM GMT)

இந்திய கிரிக்கெட் அணியின் சுழற்பந்து வீச்சு ஆல்-ரவுண்டரான சென்னையைச் சேர்ந்த வாஷிங்டன் சுந்தர், ஐ.பி.எல். கிரிக்கெட்டில் பெங்களூரு ராயல் சேலஞ்சர்ஸ் அணிக்காக விளையாடி வருகிறார். பெங்களூரு அணியில் கேப்டன் விராட் கோலியின் நம்பிக்கைக்குரிய பவுலராக மாறி விட்டதால் அவரை ‘பவர்-பிளே’யில் அதிகமாக பயன்படுத்துவதை கோலி வாடிக்கையாக கொண்டுள்ளார்.

சென்னை,

இந்திய அணிக்காக 4 டெஸ்ட், ஒரு நாள் போட்டி ஒன்று, 31 இருபது ஓவர் போட்டிகளில் விளையாடி இருக்கும் 21 வயதான வாஷிங்டன் சுந்தர் இங்கிலாந்துக்கு எதிரான டெஸ்ட் தொடரிலும் இடம் பெற்றுள்ளார். அவர் இணையதளம் ஒன்றுக்கு அளித்த சுவாரஸ்யமான பேட்டியை இங்கு பார்க்கலாம்.

கேள்வி: உங்களது சகோதரி ஷைலஜாவும் கிரிக்கெட் வீராங்கனை தான். உங்களில் பேட்டிங்கில் சிறந்தவர் யார்?

பதில்: நிச்சயம் நான் தான்.

கேள்வி: சிறுவயதில் உங்களது கிரிக்கெட் முன்மாதிரி யார்?

பதில்: பிரையன் லாரா (வெஸ்ட் இண்டீஸ்). சிறு வயதில் அவரது பேட்டிங்கை அதிகமாக பார்த்து இருக்கிறேன். அதன்பிறகு டோனி (இந்தியா).

கேள்வி: எந்த சக கிரிக்கெட் வீரருக்கு அடிக்கடி மெசேஜ் அனுப்பி தகவல்கள் பரிமாறுகிறீர்கள்?

பதில்: தமிழகத்தை சேர்ந்த டி.நடராஜன்.

கேள்வி: வலை பயிற்சியின் போது விராட் கோலியை எத்தனை முறை அவுட் செய்திருப்பீர்கள்?

பதில்: கிரிக்கெட்டில் ‘கிங்’ கோலி. வலை பயிற்சியில் கூட அவரை வீழ்த்துவது எளிதல்ல. அனேகமாக ஒவ்வொரு வலைபயிற்சியின் இரண்டு பகுதியில் ஒரு முறை அவரை அவுட் செய்திருப்பேன் என்று நினைக்கிறேன்.

கேள்வி: சென்னையில் கிரிக்கெட் விளையாடும் போது பயன்படுத்தும் வார்த்தைகளில் எதை பெங்களூரு அணி வீரர்களுக்கு கற்றுக்கொடுக்க விரும்புகிறீர்கள்?

பதில்: விடாதீங்க....

கேள்வி: இந்திய பேட்மிண்டன் வீராங்கனை சாய்னா நேவால், உங்களின் ரசிகை என்று கூறியிருக்கிறார். மற்ற விளையாட்டில் உங்களுக்கு பிடித்தமானவா் யார்?

பதில்: டென்னிஸ் வீரர் ரபெல் நடால் (ஸ்பெயின்). அவரின் நிறைய ஆட்டங்களை பார்த்து இருக்கிறேன். சில முறை அவரது ஆட்டங்கள் உந்துசக்தியாக இருந்திருக்கிறது.

கேள்வி: நீங்கள் இதுவரை வீழ்த்திய விக்கெட்டுகளில் மறக்க முடியாத விக்கெட் எது?

பதில்: எனது முதலாவது ஐ.பி.எல். சீசனில் (2017-ம் ஆண்டு புனே அணிக்காக) இறுதிப்போட்டிக்கான முதலாவது தகுதி சுற்றில் மும்பை இந்தியன்ஸ் அணியின் முக்கியமான வீரர்களான ரோகித் சர்மா, கீரன் பொல்லார்ட் ஆகியோரின் விக்கெட்டுகளை சாய்த்தது மறக்க முடியாத மகிழ்ச்சிகரமான ஒன்று.

கேள்வி: உங்களுக்கு ஒரு அரிய சூப்பர் சக்தி கிடைக்கிறது என்றால்? அது எந்த மாதிரியான சக்தியாக இருக்க வேண்டும்?

பதில்: மற்றவர்களின் கண்களுக்கு புலப்படாமல் மறையும் சக்தி வேண்டும். இதன் மூலம் எதிரணியின் ஓய்வறைக்குள் நுழைந்து அவர்களின் திட்டமிடல், யுக்திகளை அறிந்து கொள்ளலாம். ஐ.பி.எல். கிரிக்கெட்டில் சென்னை சூப்பர் கிங்ஸ், மும்பை இந்தியன்ஸ் அணிகளின் அறைக்குள் செல்ல விரும்புவேன்.

கேள்வி: உங்களது கிரிக்கெட் வாழ்க்கையை நிறைவு செய்வதற்குள் எந்தவிதமான ஒரு சாதனையை படைக்க வேண்டும் என்று விரும்புகிறீர்கள்?

பதில்: ஒரே டெஸ்டில் சதம் அடித்து மற்றும் 10 விக்கெட்டுகளுக்கு மேல் (இதுவரை எந்த இந்தியரும் இச்சாதனையை செய்ததில்லை) வீழ்த்த வேண்டும்.

கேள்வி: கிரிக்கெட் வீரராக ஆகாமல் இருந்திருந்தால் இப்போது நீங்கள் என்னவாக இருந்திருப்பீர்கள்?

பதில்: இசை கலைஞராகியிருப்பேன்.

இவ்வாறு அவர் கூறினார்.

Next Story